Norska prinsessan Märtha Louise og maður hennara, Durek Verrett, hava lagt sak í USA móti fleiri fólkum, sum áður stóðu Durek Verrett nær.
Tað váttar umboðið hjá prinsessuni, Carina Scheele Carlsen, fyri norska miðlinum VG.
Tey stevndu eru ein fyrrverandi unnusta hjá Durek Verrett, ein hálvsystir, eitt fyrrverandi umboð og ein fyrrverandi vinur. Harumframt fevnir málið um tíggju onnur fólk ella partar, sum ikki eru nevnd við navni í rættarskjølunum.
Málið snýr seg í høvuðsheitum um ærumeiðing og brot á avtalur um trúnað.
Sambært VG siga hjúnini í skjølum, sum eru latin rættinum í Los Angeles County, at eitt tilvitað álitisbrot er orsøkin til sakarmálið.
Tey hava tilsamans sett fram krøv um endurgjald á meira enn 80 milliónir dollarar. Tað svarar til umleið 533 milliónir danskar krónur.
VG ger tó vart við, at nøkur av krøvunum kunnu fevna um tað sama. Verður hædd tikin fyri hesum, kann samlaða kravið kortini vera umleið 208 milliónir krónur.
Amerikanski advokaturin hjá hjúnunum, Richard Roth, sigur við VG, at almenningurin í fleiri ár hevur dømt umdømið hjá teimum. Nú skulu fakta roynast í rættinum.
Ritzau
