Tað hendi eingin fólkaskaði, tá ein av spildurnýggju elruskbilunum hjá Landleiðini um hálgvum áttatíðina í morgun fór mannleysur á rull oman eftir Rosságøtu á Argjum, sum er brekkan millum Argjavegin í neðra og Traðagøtu omanfyri.

Men stórur materiellur skaði var. Óhappið hendi, tá tey vóru í ferð við at savna rusk inn á Argjum. Bilurin stóð mannleysur ovast í gøtuni, tá hann av onkrari orsøk fór á rull. Bilurin rendi í ein garð longri niðri í gøtuni, fór tvørtur í gjøgnum tveir betonggarðar áðrenn hann rakti næstniðastu húsini og skoraðist fastur millum húsini og trøini í garðinum. Tá hevði hann rullað einar 80 metrar mannleysur oman gjøgnum gøtuna.

Her við ovastu húsini í Rosságøtu á Argjum stóð ruskbilurin, tá hann fór á rull. Heppið var tað, at hann fór heilt oman á Argjavegin, tí tá hevði skaðin óiva verið munandi størri

– Tað var ein ræðulig sjón at síggja bilin fara á rull, segði bilførarin, tá in.fo hitti hann á staðnum.

Enn er ikki greitt, hví óhappið hendi ella hvussu stóran skaða bilurin hevur fingið.

Landleiðin vann í fjør útboðið at savna rusk inn í Tórshavnar kommunu, og í gjár tók sáttmálin við. Hetta er tí annar dagurin, at hesin elbilurin hevur verið til arbeiðis at savna rusk, so tað sigur seg sjálvt, at tað kemur illa við hjá nýggja veitaranum hjá Tórshavnar kommunu.

Landleiðin hevur keypt sjey elruskbilar. Fimm eru komnir, tveir skulu koma afturat.