FYRSTU FERÐ Á LANDSLIÐNUM
AUGUST, 1998: Landsliðsboðini koma ikki óvart á føroyingar. Jákup á Borg hevur gingið undan sum framherji á liðnum hjá B36 í føroysku landskappingini. Hann er 18 ára gamal, tá hann roynir seg á føroyska landsliðnum fyri fyrstu ferð. Føroyar spælir á útivølli móti Bosnia, sum vinnur dystin 1-0. Jákup á Borg verður innskiftur miðskeiðis í seinna hálvleiki. - Tað kemur rættiliga óvart á meg. Eg segði fyri tveimum máðanum síðan, at eg vónaði at fáa landsliðsboð um tvey ár, men eg hevði ikki væntað, at tað skuldi koma so skjótt, sigur Jákup á Borg undan dystinum.
STRÍÐIST FYRI PLÁSSINUM
JUNI, 1999: Føroyska landsliðið skakar fótbóltsheimin, tá Hans Fróði Hansen tryggjar Føroyum ein javnleik móti Skotlandi á heimavølli. Jákup á Borg spælir sín sætta landsdyst, tá hann loysir Jóhannis Joensen av í seinna hálvleiki. Allan Simonsen hevur eina ætlan við unga havnarmanninum. – Ungu leikararnir skulu eisini sleppa at snúsa til landsliðið. Tá teir hava roynt tað nakrar ferðir, eru teir eftirhondini meira harðhúðaðir og búnir til veruliga at fáa kjansin, sigur Allan Simonsen við Dimmalætting aftaná dystin.
NOYÐIST UTTANLANDS
SEPTEMBER, 1999: Jákup á Borg er við frá byrjan í seinna hálvleiki, tá Føroyar tapa 1-0 á heimavølli móti Litava. Tað er hansara fyrsti veruligi møguleiki at vísa Allan Simonsen, hvat hann er mentur. Men hann tekur ikki av. – Todi Jónsson er sjálvskrivaður. Og Uni Arge spælir uttanlands, so hann hevur tann fyrimunin. Eg má bara sleppa mær av landinum, so eri eg har, sigur framherjin í viðtalu við Dimmalætting.
TEKUR IKKI AV
MARS, 2001: Jákup á Borg er skýrdur sum ein hin mest evnaríki føroyski fótbóltsleikarin nakrantíð. Men 21 ára gamli framherjin úr B36 hevur trupult við at vinna sær pláss á landsliðnum. Hann hevur rætt og slætt ikki prógvað, at hann hevur uppiborið tað. – Trupulleiki hevur bara verið, at eg ongantíð hava sligið ordiliga til, tá eg havi fingið møguleikan. Sjálvandi ótolnist eg, tá eg ikki komi á vøllin, men tað er mín egna skuld, sigur hann undan dystinum móti Luksemburg á útivølli. Føroyar vinna dystin 2-0, og Jákup á Borg verður skiftur út, tá fáir minuttir resta í.
UPPIBORIÐ BROTSSPARK
MARS, 2001: Jákup á Borg spælir fyri fyrstu ferð í samfullar 90 minuttir á føroyska landsliðnum, sum er á vitjan í Russlandi. Heimaliðið vinnur 1-0. Jákup á Borg verður feldur inni í brotsteiginum í seinna hálvleiki, men dómarin floytar ikki fyri brotssparki. – Satt at siga varð eg so bilsin av tí, at eg als ikki hugsaði um at mótmæla, sigur Jákup á Borg aftaná dystin.
TIG SO, JOHN!
SEPTEMBER, 2002: Føroyar spælir 2-2 móti Skotlandi á Svangaskarði. Jákup á Borg eigur uppleggini til bæði málini hjá John Petersen. Við uppleggunum fær hann frið fyri John Petersen, sigur hann við Sosialin aftaná dystin. – Nú var tað soleiðis í vikuni, at John hevur gramt seg óført um, at hann vil hava bóltin, so har var bara eitt at gera fyri at fáa hann at tiga!, sigur hann aftaná dystin.
Jákup Mørk, blaðmaður á Sosialinum, ivast ikki, tá hann skal meta um avrikið hjá Jákupi á Borg. – Hann hevur nú í eitt ár verið fastur fúsur í høgra borðið, og dysturin hesaferð var ein stór undirstrikan av, at hann eisini fer at røkja plássið í langa tíð framyvir, skrivar Jákup Mørk í dystarfrásøgnini.
MAÐURIN VIÐ HØGRA BEININUM
OKTOBER, 2002: Jákup á Borg eigur aftur hesa ferð næstseinasta fótin á bóltinum, tá Føroyar fáa mál. Føroyska landsliðið roynir seg í Hannover móti Týsklandi, sum vinnur 2-1. Maðurin við gylta høgrabeininum hevur tí lagt upp til øll trý málini, sum landsliðið hevur skotið higartil í hesi undankappingini. – Tað sær út til at gerast ein góður vani. Óluksáligt, at upplegg ikki telja við, tá máltindurin verður uppgjørdur, sigur Jákup á Borg skemtandi aftaná dystin.
FYRSTA LANDSLIÐSMÁLIÐ
APRÍL, 2003: Jákup á Borg skýtur sítt fyrsta mál í føroysku landsliðstroyggjuni, tá Kasakstan vitjar í venjingardysti á Svangaskarði. Føroyar vinnur 3-2, og Jákup leggur føroyingarnar á odda 1-0.
AFTUR Á BLETTINUM
AUGUST, 2004: Jákup á Borg hevur roynt eina rúgvu, áðrenn hann skýtur sítt seinna mál á landsliðnum. Royndarvenjingarnar í Watford, Liverpool og Crewe góvu ikki úrslit. Havnarmaðurin skiftir undan kappingarbyrjan úr B36 til grannarnar í HB, áðrenn hann fær leigusáttmála í danska OB. Jákup á Borg leggur Føroyar á odda 1-0, tá landsliðið vinnur 3-2 á Svangaskarði í venjingardysti móti Malta.
ZIDANE Á MÓTSTØÐULIÐNUM
SEPTEMBER, 2004: Jákup á Børg fær seg av álvara royndan, tá Frakland, við Zinedine Zidane á liðnum, tekur ímóti. Føroyar tapa 3-0. – Eg kann reypa mær av, at Zidane hevur gjørt fríspark móti mær, sigur Jákup á Borg flennandi í viðtalu við Dimmalætting í juli í 2010.
AVSETTUR
JUNI, 2005: 25 ára gamli Jákup á Borg hevur átt plássið sum miðvallari í høgru seinastu fýra árini. Hansara avrik hava sveiggjað nógv, men HB-leikarin hevur verið millum teir mest eyðsýndu fleiri ferðir. Hendrik Larsen, landsliðsvenjarin, gevur honum tó ikki møguleikan, tá Írland vitjar á Tórsvølli. – Tað er sjálvandi eitt stórt vónbrot. Men eg var ikki meira fornermaður enn so, at eg vildi vísa, hvat eg standi fyri, sigur Jákup á Borg, sum spælir seinastu 10 minuttirnar, aftaná dystin. Írlandi vinnur 2-0.
SORL!
SEPTEMBER, 2006: Jógvan Martin Olsen, landsliðsvenjari, væntar, at Jákup á Borg verður millum leikararnar, sum taka ábyrgd á landsliðnum, nú aldursskiftið skal fremjast. Tað gongur ikki væl í fyrstu royndunum. Føroyar tapa 6-0 á heimavøli móti Georgia, og 6-0 á útivølli móti Skotlandi, og Jákup á Borg røkir uppgávuna sum høgri bakkur. Hann er framvegis bjartskygdur. – Tað er tungt at tapa tveir dystir 6-0, men tá ið eitt nýtt lið skal spælast saman, so kemur slíkt fyri, sigur hann.
TRÝSTUR
SEPTEMBER, 2007: 27 ára gamli Jákup á Borg er brádliga ikki sjálvskrivaður á landsliðnum longur. Hann verður fluttur í heilum. Á útivølli móti Litava røkir hann uppgávuna sum vinstri bakkur. – Við royndunum, sum hann hevur, so roknaði eg við, at hetta var skilabetri, enn at geva Johan Troest Davidsen sína debut, sigur Jógvan Martin Olsen aftaná dystin. Føroyar tapa 2-1.
ALBOGAN Í HØVDIÐ
OKTOBER, 2008: Jákup á Borg hevur mist liðskiparabandið í HB og skiftir í summarsteðginum til barndómsfelagið B36. Hann er nógv plágaður av einum skaða í lærkrykanum. Men hann er til dystin fús, tá Rumenia vitjar á Tórsvølli. Geylið hoyrist um allan Tórsvøll, tá Sorin Ghionea langar albogan í høvdið á Jákupi, og Ghionea verður útvístur. – Hann slóð út eftir mær og rakti meg í andlitið. Eg spældi eitt sindur upp á tað, men í hesum spælinum mast tú gera tær dælt av slíkum støðum, sigur Jákup á Borg aftaná dystin. Rumenia vinnur 1-0.
ASKHAM YNSKIR IKKI JÁKUP
MARS, 2009: Heðin Askham fær ábyrgdina av føroyska landsliðnum í venjingardystinum móti Íslands. Og Askham velur ikki at hava 29 ára gamla Jákup á Borg við í hópinum. – Eg eri ógvuliga vónsvikin. Eitt er, at venjarin ikki metir meg hava tað, sum skal til, fyri at spæla á landsliðnum. Men eg havi verið partur av hópinum í meira enn 10 ár, og tí haldi eg tað vera løgið, at eg einki hava fingið at vita undan úttøkuni, sigur Jákup á Borg. Mikkjal Thomassen, venjari hjá B36, stuðlar Jákupi. – Eg haldi tað vera óumhugsað og ótrúliga respektleyst, sigur Mikkjal Thomassen.
STRÍÐIR SEG AFTUR
SEPTEMBER, 2009: Jákup á Borg er framvegis skaðaplágaður, og tað ávirkar hansara pláss á landsliðnum. Tað er ein sannroynd, at hansara royndir er eingin fyrimunir longur. Brian Kerr velur óvæntað at hava Jákup á Borg sum framrættaðan miðvallara í heimadystinum móti Litava. Og tað var ein røtt avgerð. Jákup á Borg spælir framúrskarandi, tá Føroyar vinna 2-1 á Litava.
FARVÆL
JULI, 2010: Aftaná 69 landsdystir og tvey mál, boðar Jákup á Borg frá, at hann er givin á føroyska landsliðnum. 30 ára gamli havnarmaðurin hevur ikki orku og tíð at umboða Føroyar longur. Hann hevur hugsað um avgerðina leingi. Orsøkin er fyrst og fremst, at hann hevur verið illa plágaður av skaðum. – Eg eri eingin unglingi longur. Eg havi tørv á hvíld, og eg seti meg ikki føran fyri at spæla við fullari megi á landsliðnum longur, sigur Jákup á Borg. Brian Kerr, landsliðsvenjari, harmast avgerðina.
