Seinnapartin í morgin klokkan 17 spæla tvey føroyingalið í Íslandi steypafinalu á tjóðarleikvøllinum, Laugardalsvøllinum.
Tað verður liðið hjá Jóan Símuni Edmundssyni og Pæturi J. Petersen, KA sum spælir steypafinalu móti liðnum hjá Gunnari Vatnhamar, Víkingi Reykjavík.
Tað verður fimti ferð - óannsæð um tað verður Jóan Símun og Pætur, ella Gunnar - at føroyingar vinna íslendsku steypafinaluna.
Uni Arge breyt ísin í 2000, tá hann sum tann fyrsti føroyingurin vann eina steypakapping uttan fyri Føroyar. Hetta gjørdi Uni saman við liði sínum, Akranesi, sum í steypafinaluni á Laugardalsvøllinum í árinum 2000 vann 2-1 á ÍBV. Í 1998 taptu Uni Arge og Jens Martin Knudsen íslendsku steypafinaluna við Leiftri ímóti júst ÍBV. Uni skoraði ikki í finaluni í 2000, men hann skoraði í hálvfinaluni ímóti FH.
##med2##
Í 2003 gjørdist Julian Johnsson annar føroyingurin, sum vann íslendsku steypakappingina. Í steypafinaluni á Laugardalsvøllinum í 2003 vann Julian saman við liði sínum, Akranesi 1-0 á FH.
##med3##
Í 2006 gjørdist Símun Samuelsen triði føroyingurin, sum vann íslendsku steypakappingina. Saman við liðfeløgunum í Keflavík vann Símun á Laugardalsvøllinum íslendsku steypakappingina við einum 2-0 finalusigri á KR. Í steypafinaluni hevði Símun gyltan møguleika at skora til 3-0, men tók ikki av.
##med4##
Fjórðu ferð føroyingar vunnu íslendsku steypakappingina var í 2017, tá ÍBV við Jónasi Tór Næs og Kaj Leo í Bartalsstovu á liðnum vann 1-0 á FH, ið hevði Gunnar Nielsen í málinum. Gunnar Heiðar Þorvaldsson skoraði sigursmálið til 1-0 í 37. minutti. Kaj Leo í Bartalsstovu legði upp til málið, og í teimum seinastu minuttunum var tað bara ein rimmar bjarging hjá Gunnari Nielsen í FH-málinum, ið forðaði Kaj Leo at økja til 2-0.
##med5##