Løgtingsnevndirnar skulu hava betri møguleika at gera sítt arbeiði. Og almenningurin skal hava møguleika at fylgja við, sigur Tjóðveldi.
Eitt týðandi amboð í okkara fólkaræði er arbeiðið í ymsu nevndunum hjá løgtinginum. Tað heldur Tjóðveldi, sum í sínum uppskoti um at broyta Stýrisskipanarlógina mælir til at broyta nevndararbeiðið grundleggjandi.
Les eisini: Tjóðveldi vil broyta Stýrisskipanarlógina
Sambært uppskotinum hjá Tjóðveldi skulu løgtingsnevndirnar hava møguleika at skipa fyri almennum fundum og hoyringum. Møguleiki skal vera at senda fundirnar beinleiðis, bæði í útvarpi og sjónvarpi, soleiðis at fólk kunnu fylgja við.
Nevndirnar skulu hava møguleika at taka mál upp av sínum eintingum. Minnilutaverja skal vera innbygd í skipanina, soleiðis at ein triðingur av nevndarlimunum skulu kunna krevja mál til viðgerðar.
Eisini skulu løgtingsnevndirnar hava munandi betri møguleikar at viðgera tey mál, sum koma inn í nevndina. Tað skal bera til hjá nevndunum at innkalla fólk eftir tørvi.
Tjóðveldi hevði fyrrapartin tíðindafund, har flokkurin legði fram uppskot um fleiri broytingar í Stýrisskipanarlógini.
Hoyr samrøðu við Gunvør Balle um broytingarnar
Sirið Stenberg er løgtingskvinna fyri Tjóðveldi og eisini forkvinna í Landsstýrismálanevndini hjá løgtinginum.
Við at trýsta á pílin undir myndini ber til at hoyra samrøðu við Sirið Stenberg, sum vil broyta nevndararbeiðið grundleggjandi.
