Tá ið klokkan vísti 15 minuttir í góðveðrinum við Margáir, var tað avgjørt, at KÍ skuldi einki hava við sær til hús. Tá var EB/Streymur frammanfyri 2-0, og í sambandi við hesi bæði málini, og tá innskifti Gunnar Zachariasen miðskeiðis í 2. hálvleiki økti um heimaleiðsluna, var upprunin deyðbóltsstøður.
Liðformaðurin Hans Pauli Samuelsen umsetti brotsspark til 1-0. Atli Danielsen var óheppin at brúka hondina eftir hornasparksstøðu. Tá ið Niels Pauli Danielsen økti til 2-0, var tað eftir at Gert Hansen hevði lagt 60 metra frísparkssending. Pól Jóhannus Justinussen snittaði víðari, og eftir at Arnbjørn Hansen og Leif Niclsen høvdu samanspælt, setti væl upplagdi Niels Pauli Danielsen, sum hevði fýra mótstøðumenn kring seg, bóltin í málið.
So var mótbrekkan tung hjá KÍ, sum fyrra partin av 1. hálvleiki var rent um koll av væl uppløgdu heimamonnunum. Fram ímóti steðginum luktaði tað av KÍ máli. Bæði liðini misnýttu risa stórar møguleikar. Tá so heimaleiðslan varð 3-0, var spurningurin bara, hvussu stórur sigurin fór at verða. Nedende pyntaði um, tá ið hann við høvdinum stýrdi bóltin í mál eftir innlegg úr høgru:
– Fyrsta løtan var dýr fyri okkum. Tá høvdu vit als ikki tak á teimum. Tað eyndaðist at fáa skil á tingunum, men hóast vit leikliga síðani vóru á hædd við teir, so bar tað ikki til at vinna tað mista aftur, staðfesti KÍ venjarin Eyðun Klakstein.
