Tað spruttar við lívi í kappróðrinum í Klaksvík. Fyrr í dag vunnu genturnar á Fípuni Føgru barnaróðurin millum gentur, og nýggi báturin hjá Klaksvíkar Róðrarfelag, Sævarmoy, endaði á triðja plássi.
Á norðoyastevnu vunnu dreingirnir úr Hósvík umborð á Heyki kappingina millum 5-mannafør við dreingjum, og teir vunnu aftur á Skálafjørðinum, men tá var tað í øgiligari kapping við Fípuna Føgru.
Í dag vóru tað hesir báðir bátarnir, sum vóru fremstir mest sum allan teinin, men tað varð ikki so spennandi í dag, sum tað var á Skálafjørðinum.
Fípan Fagra fekk skjótt stavnin og skutin framum, og tá ið stóra feltið nærkaðist málinum, var Fípan Fagra eina bátslongd undan Heyki.
Royndin Fríða úr Vági endaði á triðja plássi.
At tað er nógv lív í kappróðrinum í Klaksvík sást aftur í, at tríggir bátar hjá Klaksvíkar Róðrarfelag luttøku í hesum róðrinum. Sævarmoy endaði á fimta plássi – aftanfyri Drekan hjá Havnar Róðrarfelag – og Tekla endaði aftari í røðini.
1 Fípan Fagra 05:14.33
2 Heykur 05:17.21
3 Royndin Fríða 05:19.39
4 Drekin
5 Sævarmoy
