Eftir eina heldur drúgva ferð, komu føroysku kvinnurnar til Andorra klokkan gott fýra sunnumorgunin. Men lagið var kortini gott alla tíðina, og klokkan fimm seinnapartin var venjing á skránni, skrivar Fótbóltssambandið.
Ferðingin hjá føroyska kvinnulandsliðnum, sum fríggjadagin vann ein flottan 2-1 sigur á Montenegro, gjørdist heldur drúgvari enn ætlað. Flogfari hjá Atlantsflog, ið fleyg hópin til Danmarkar, fór avstað til ásetta tíð. Men tá ferðalagið skuldi flúgva víðari til Barcelona, var flogfarið seinkað, og í Barcelona vóru trupulleikar við at fáa fatur á øllum viðførinum.
Sum fráleið eydnaðist at fáa bilbukt við íkomnu avbjóðingarnar, og síðani var farið við bussi til Andorra. Ein túrur, ið tók góðar tríggjar tímar. Lagið í hópinum var tó gott alla tíðina, og tá klokkan nærkaðist fýra sunnumorgunin, eftir at hava ferðast í nærum fjúrtan tímar, kom ferðalagið upp á pláss í lítla fjallalandinum, sum liggur á markinum millum Spania og Frankaríki.
Tvær venjingar hava verið á skránni undan dystinum, sum verður í dag klokkan 18:00 á Andorra La Vella stadion. Niðanfyri eru myndir frá venjing, sum Jakoba Svensdóttir hevur tikið.
##ms##
