Sæð við føroyskum landsliðsbrillum gjørdist tað ikki eitt gott kvøld í bestu donsku hondbóltsdeildini í kvøld.
Landsliðsmálverjin, Rakul Wardum og liðfelagarnir í Ringkøbing taptu stórt 22-36 fyri verandi meistarunum, Esbjerg á útivølli. Esbjerg var á odda 19-13 í steðginum.
Tað eydnaðist bert Rakul at bjarga einari av 14 málroyndum hjá Esbjerg ta tíðina hon var á vøllinum. Kappingarneytin, Ida Marie Pedersen bjargaði átta av 26 málroyndum, og stóð seg sostatt betri í kvøld.
Liðið hjá Janu Mittún, Viborg tók ímóti liðnum hjá Pernillu Brandenborg, Keypmannahavn á heimavølli í kvøld.
Keypmannahavn vann dystin 25-24. Viborg var annars á odda 16-13 í steðginum.
Jana slapp ikki nógv upp í part í kvøld. Pernille skoraði eitt mál fyri Keypmannahavn. So tað gjørdist tíverri ikki tann føroyingauppgerðin ein hevði vónað.