FarCargo P/F hevur nú undirskrivað keypssáttmála um keyp av einum farmaflogfari av slagnum Boeing 757-200. Flogfarið er 47 metrar langt, kann flúgva einar 7.000 km í einum og tekur uml. 35 tons av farmi. A320 flogførini sum vit kenna á Føroya-rutuni eru til samanbering 37,5m long.
Eftir ætlan fer flogfarið í flúgving um 2-3 mánaðir og fer í fyrsta umfarið at flúgva úr Vágum til New York.
Í tíðindaskrivi frá nýggja flogfelagnum, sigur Birgir Nielsen stjóri í FarCargo:
– Hetta er ein stórur dagur hjá okkum. Vit fegnast um, at vit eru komin so langt og síggja nú fram til at kunna byrja veruliga virksemið við flogfarmi. Hetta er eisini ein gamal dreymur, serliga hjá stigtakarunum Heðin Krett, Hans Meinhard á Høgabóli og Andrew Djurhuus, sum nú gerst veruleiki.
Fyrireikingararbeiðið hevur tikið eitt gott ár, har avbjóðingin serliga hevur verið at finna tað rætta flogfarið. Eisini hevur tað tikið tíð at fáa loyvir upp á pláss og at fáa praktisk viðurskifti løgd til rættis.
Raksturin av farmaflutninginum hjá FarCargo verður skipaður í samstarvi við svenska felagið West Atlantic, sum fer at umsita flogloyvið.
– Okkara ætlan er, at FarCargo um fá ár yvirtekur øll loyvir og flogumsiting til Føroyar. Í fyrsta umfari verða 10 flogfólk sett í fast starv hjá felagnum. Felagið søkir í miðlunum í dag eftir flogskiparum og stýrimonnum at byrja skjótast gjørligt, sigur Birgir Nielsen.
Regin Jacobsen stjóri í Bakkafrost:
– Hetta er ein nýggjur kapittul í føroyskari útflutningssøgu, har endamálið er at veita feskan laks av bestu dygd bæði í USA, Ísrael og øðrum fjarmarknaðum, eitt døgn eftir at fiskurin svam á føroyskum firðum. Vit meta, at hetta fer at hava stóran týdning fyri áhaldandi at menna kappingarføri okkara. Kundar, eitt nú í Ísrael og á amerikanska sushi marknaðinum, eftirspyrja eina feska vøru og fara vit við hesi munandi styttu farleið at veita okkara kundum feskastu vøru á marknaðinum. Vit hava í nógv ár havt sum mál at menna amerikanska marknaðin, og fer hetta átakið, saman við virkinum hjá okkum í New Jersey, at geva okkum góðan møguleika at geva kundanum bestu tænastu. Í mun til verandi flutning umvegis flogvallir í Evropa, fer nýggja farleiðin at gera, at vøran verður fleiri dagar feskari, tá hon kemur á marknaðin, hevur eina óbrotna køliketu umframt at vit spara munandi í CO2 útlátið, sigur hann.
Á heimferðini fer FarCargo at bjóða føroyskum og útlendskum flutningsfeløgum at keypa lastapláss umborð á farmaflogfarinum.
– Vit vóna at føroyski marknaðurin fer at njóta gott av nýggju farleiðini – og at hetta fer at geva nýggjar møguleikar í Føroyum, verður sagt í tíðindaskrivi frá FarCargo.
Tað er kendi føroyski fjøllistamaðurin Anker Eli Petersen, sum hevur prýtt tað grafiska designið á flogfarinum hjá FarCargo.
FarCargo P/F er dótturfelag hjá Bakkafrost, umframt at íløgufelagið Sp/f 25.05.2021 eisini er partaeigari.
Stjóri er Birgir Nielsen. Nevndarformaður er Regin Jacobsen.
Í nevndini sita Rúni M. Hansen, Hans Meinhard á Høgabóli, Heðin Krett og Andrew Djurhuus.
