Í november í fjør skipaði Vágs kommuna fyri matarkvøldi fyri sínum borgarum. Kvøldið eydnaðist sera væl, og eini 120 fólk fingu sær eina góða máltíð.
Nú fara tey í Vági at taka stig til enn eitt slíkt kvøld, sum verður týskvøldið hin 29. februar, har byrjað verður klokkan 17 og hildið verður fram til klokkan 20.
Matarkvøldið verður í hølunum hjá Frelsurnarherinum.
Takin við kvøldinum er at geva borgarum í Vági møguleika at seta seg til borðs - sum einstaklingur ella sum familja og njóta eina góða máltíð saman.
- Gerandisdagurin hjá nógvum familjum – kanska serliga smábarnafamiljum – er hektiskur. Nógv skal avrikast, og samdøgrið er ikki longri enn 24 tímar.
Í Vági vísa tey á, at fyri at lætta eitt sindur um dagin, bjóðar kommunan øllum borgarum til matarkvøld.
- Á matarkvøldinum ber eisini til at gera matpakkar til børnini, sum tey kunnu hava við sær í barnagarð og skúla dagin eftir.
Lagt verður aftrat, at allir borgarar í Vágs kommunu eru vælkominir, og á heimasíðuni hjá kommununi er ein leinkja, har til ber at tekna seg til matarkvøldið.
- Tilmeldingin er ikki bindandi, men verður bert brúkt sum ábending um, hvussu nógvur matur skal gerast.
Í Vágs kommunu leggja tey aftrat, at um fólk hava hug at hjálpa til í samband við kvøldið, eru tey vælkomin at siga frá.
