Føroyar eru fyri fyrstu ferð yvirhøvur við í HM endaspæli í kvinnuhondbólti, og í dag hava Føroyar vunnið fyri aðru ferð. Tað vil siga, at Føroyar hava vunnið tveir HM dystir og tapt ein. Í dag var tað í Trier í Týsklandi ímóti Paraguay.
Úrslitið var 36-25 eftir 16-13 í hálvleikinum.
Favorittsigurin ber staðfestingina við sær av, at Føroyar hava tryggjað sær pláss í miðumfarinum. Har vera mótstøðuliðini týsku vertirnir, Serbia og Ísland. Fyrsti dysturin verður týskvøldið ímóti Týsklandi.
Føroyski sigurin er størri enn tann, sum Montenegro og Spania vunnu ímóti Paraguay, og Føroyar hava tvey stig við sær í næsta umfarið.
-Vit skulu spæla í miðumfarinum og hitta tríggjar góðar tjóðir í Dortmund. Talan er um stórar dystir, og um tað eydnast at vinna ein dyst aftrat, so verður tað væl meiri enn tað, sum vit kundu roknað við. Serliga hugaligt var tað, at fleiri av teimum, sum ikki hava spælt so nógv, í dag av álvara tóku av. Ikki minst hugsi eg um vongspælararnar, sigur føroyski venjarin Claus Mogensen í samrøðu við Sigurjón Einarsson í sjónvarpinum hjá Kringvarpi Føroya.
Tað var týdningarmikið fyri føroyska liðið, at leiðslan tíðliga í seinna hálvleiki var so mikið trygg, at tað bar til at halda nakrar av lyklaspælarunum á beinkinum, so tær kundu hvíla seg og vera heilt væl fyri undan fyrsta dystinum í miðumfarinum.
Miðskeiðis í seinna hálvleiki var leiðslan 26-19, og tá takkaðu Pernille Brandenborg, Jana Mittún og Súna Krossteig Hansen fyri seg. Tað bar við sær, at onkrar, sum higartil ikki hava spælt so nógv, spældu nógv í seinna hálvleiki. Eitt nú Marianna Geirsdóttir Eystberg á bakkinum, væl upplagda Anna Elisabeth Halsdóttir Weyhe, sum á vinstra veingi skoraði fimm mál, eftir at hon avloysti Rannvá OLsen, ið hevði skorað tvey mál, og Marita Mortensen á bakkinum og so Bjarta Osberg Johansen á strikuni, Elsa og Karin Egholm í høgru og Vár Bentsdóttir Zachariasen, sum í miðverjuni var saman við tvíburasystrini Lív.
Dagsins spælari varð kosin at vera Lív Sveinbjørnsdóttir Poulsen, sum fyrstu lítlu løtuna skoraði fýra av fimm málum.
Í fyrra hálvleiki misnýtti føroyska liðið nógvar upplagdar møguleikar, men sum seinni hálvleikur leið, kendist tað sum um, at føroysku spælararnir sleptu hondbremsuni og av álvara foldaðu seg út. Serliga eyðsýnd var Maria Pálsdóttir Nólsoy, sum skoraði seks mál og var føroyskur toppskjútti.
Bjarta Osberg Johansen var í dag á landsliðnum fyri 50. ferð. Hon fegnast um úrslitið og gleðir seg um møguleikan at halda fram í kappingini:
-Vit rokna við møguleikanum, og tá ið vit hava megnað at vunnið ímóti Spania, so eigur møguleikin at vera at vinna fleiri stig, sigur Bjarta Osberg Johansen.
Lív Sveinbjørnsdóttir Poulsen var dagsins spælari:
-Eftir ikki góða avrikið ímóti Spania, var eg øguliga fokuserað í dag, og eg fegnast um góða avrikið, og nú eru vit spentar at royna okkum í Dortmund í miðumfarinum, sum vit av góðum grundum ikki áður hava roynt okkum í, sigur Lív S. Poulsen
Føroyar – Paraguay 36-25 (16-13)
Føroyar:
Maria Pálsdóttir Nólsoy 6
Anna Elisabeth Halsdóttir Weyhe 5
Lív Sveinbjørnsdóttir Poulsen 4
Súna Krossteig Hansen 4
Marianna Geirsdóttir Eystberg 4
Pernille Brandenborg 3
Jana Mittún 2
Karin Egholm 2
Rannvá Olsen 2
Marita Mortensen 2
Bjarta Osberg Johansen 1
Elsa Egholm 1
Lív Bentsdóttir Zachariasen
Vár Bentsdóttir Zachariasen
Málverjar
Rakul S. Wardum 29 min. 8/22 36,4 %
Annika Fríðheim Petersen 27 min. 4/14 33,3 %
