- Eg eri sera væl móttikin og tað takki eg fyri.
Tað sigur Gerhard Lognberg, nýklaktur Sambandsmaður.
Hann varð koyrdur úr Javnaðarflokkinum í fjør og nakað síðani varð kunngjørt, at hann var farin upp í Sambandsflokkin.
Og tá ið Sambandsflokkurin hevði landsfund í dag, var tað eisini fyrsti Landsfundur hjá Gerhard sum sambandsmanni.
Og hann varð móttikin við opnum ørmum og tey flestu, sum høvdu orðið, nýttu eisini høvi til at bjóða honum vælkomnan í flokkin.
Og sjálvur duldi hann ikki fyri, at hann føldi seg vælkomnan í Sambandsflokkinum.
- Eg føli meg vælkomnan ímillum tykkum og tað eri eg fegin um, segði Gerhard Lognberg í síni fyrstu landsfundarrøðu sum nýklaktur sambandsmaður.
Annars fegnaðist hann mest um stóru tunlasemjuna, sum nú er gjørd ímillum allar flokkar á tingi um Eysturoyartunnilin og Sandoyartunnilin.
Tað hevur fylt nógv hjá honum, sigur hann, og hann vónar nú, at semjan eisini verður veruleiki.
