Higartil hevur verið neyðugt at farið uttanlands fyri at taka eina sonevnda stylecoach/stylist-útbúgving, men nú er hetta ikki neyðugt longur.
Tað sigur Skeiðsdepilin, sum fyri fyrstu ferð í Føroyum skipar fyri hesi útbúgving.
Tað er Sunneva Thorsteinsson, sum sjálv hevur útbúgving innan stylecoach, umframt frisør og kosmetologútbúgving, sum hevur tikið stig til hetta.
Sunneva er leiðari á Frisørdeildini á Tekniska Skúla í Havn og hevur altíð verið hugtikin av øllum tí, sum fær ein persón at taka seg fram frá tí allar bestu síðuni.
- Tað er her, at styling kemur inn í myndina, sigur hon.
Hon sigur, at við røttu amboðunum kanst tú púrasta broyta ein persón frá at vera ein grá mús til at traðka fram - júst sum tú ynskir tað.
- Nýggja útbúgvingin lærir teg at kenna tína stílkjarnu, og harvið gerst tú eisini tryggari, og títt sjálvsvirði hækkar munandi.
Skeiðsdepilin, sum stendur aftan fyri skeiðið, vísir á, at útbúgvingin eitt nú kann hjálpa tær í søluarbeiði, tá tú skalt søkja arbeiði - ella bara skal selja eitt hugskot.
Nýggja útbúgvingin byrjar hin 4. februar í ár.
