Ein 43 ára gamal grønmetishandilsmaður og pápi til tvey børn yvirmannaði annan av gerningsmonnunum undir einum skottilburði á Bondi Beach í avstralska býnum Sydney fyrr í dag.
Tað upplýsa Sky News og tíðindastovan dpa.
Maðurin eitur Ahmed al-Ahmed. Sambært dpa hava avvarðandi hansara staðfest, at tað var hann, sum yvirhálaði gerningsmannin undir álopinum, sum endaði við at kosta tilsamans 12 fólkum lívið.
Í videoupptøkum frá Bondi Beach sæst al-Ahmed sníkja seg upp aftanfyri ein mann, sum skjýtur skot við einum riflulíknandi vápni.
Ahmed al-Ahmed leypur síðani á gerningsmannin aftanífrá, og eftir eitt sindur av ófriði, eydnast tað al-Ahmed at draga vápnið úr hondunum á hinum manninum.
Gerningsmaðurin dettur afturá, meðan Ahmed al-Ahmed peikar byrsuna móti honum. Eftir eina løtu setur grønmetismaðurin vápnið móti einum træi, meðan maðurin, sum skeyt stutt áðrenn, so spakuliga gongur burtur.
Ahmed al-Ahmed býr í býarpartinum Sutherland í Sidney.
Sambært dpa varð hann eftir hendingina á Bondi Beach innlagdur á sjúkrahús, har hann varð skurðviðgjørdur fyri skotsár á armi og aðrari hond.
Sambært avstralsku løgregluni vóru í minsta lagi tveir gerningsmenn í skottilburðinum, sum myndugleikarnir lýsa sum eina yvirgangsatsókn.
Millum tey 12, sum vórðu dripin í sambandi við álopið, er ein av gerningsmonnunum ein.
/Ritzau/
