Í dag varð avtala gjørd á fólkatingi, sum tryggjar føroyingum í Danmark fullan rætt til familjuveitingar.
Føroyingar høvdu henda rætt inntil fyrrverandi danska stjórnin samtykti eitt upptjeningsprinsipp, ið hevur rakt fleiri føroyskar barnafamiljur, ið fóru til Danmarkar at búgva.
Hetta hevði við sær, at tú skalt hava búð í tvey ár í Danmark innan fyri tey seinastu tíggju árini fyri at hava rætt til fulla familjuveiting. Hetta gjørdi eisini, at stakir uppihaldarar úr Føroyum, sum høvdu havt rætt til dupultan lestrarstudning, mistu henda rætt, sigur Sjúrður Skaale, fólkatingsmaður.
Lógarbroytingin rakti fleiri rættiliga meint, og var eisini brot á siðvenjuna sum er, at føroyingar og danir hava full rættindi londunum hvør hjá øðrum.
Tí tók Aksel Johannesen málið upp á fólkatingi, tá hann hevði sætið í vár, og Sjúrður Skaale hevur síðani tingast víðari við donsku stjórnina. Í juni var ein fyribilsavtala gjørd, og Sjúrður Skaale hevur eisini tingast við donsku stjórnina um málið í sambandi við donsku fíggjarlógina, sum skal viðtakast í næsta mánað.
Tað hevur verið eitt sindur óvist, hvussu tað fór at enda, men í dag kom tað endaliga upp á pláss, tá tað gjørdist partur av eini avtalu millum donsku stjórnina og hennara stuðulsflokk á fólkatingi. Talan er ein um eina undir-avtalu í sambandi við samráðingarnar um donsku fíggjarlógina, sigur Sjúrður Skaale.
Avtalan kann síggjast VIÐ AT TRÝSTA HER
