Heilsuverkið er ein av teimum mest grundleggjandi tænastunum í okkara samfelagi. Øll eru vit tengd at tí – sum sjúklingar, avvarðandi ella starvsfólk. Tí er tað avgerandi, at vit halda fram at menna og styrkja heilsuverkið, so tað kann lofta teimum avbjóðingunum, sum eru í dag og í framtíðini.
Ein týdningarmikil liður í hesum er at virðismeta tey starvsfólk, sum hvønn dag bera heilsuverkið. Ein árligur skattafrádráttur á 25.000,- kr til starvsfólk í heilsu- og røktarøkinum er eitt stig í rætta leið. Tað er bæði ein viðurkenning av teirra arbeiði og eitt ítøkiligt amboð til at halda fast í og draga til okkara dugnalig fólk.
Somuleiðis er tørvur á at byggja út og menna tænasturnar. At seta eina rehabiliteringsdeild á stovn og gera eina greiða heildarætlan saman við heilsufakfólkum kann tryggja, at vit arbeiða meira fyribyrgjandi og samanhangandi. Tað er eisini neyðugt at stytta bíðitíðirnar til bæði kropsliga og sálarliga viðgerð, tí hjálp má koma, tá ið tørvur er á henni.
Serligur dentur eigur eisini at leggjast á sálarliga heilsu, ikki minst hjá børnum og ungum. Tí er tað umráðandi, at Barna- og Ungdómspsykiatriin verður styrkt og raðfest.
Samstundis er mentan og útbúgving ein grundarsteinur í einum sunnum samfelagi. Skúlaskipanin skal tryggja góðar karmar fyri bæði næmingar og lærarar, so vit kunnu geva okkara børnum bestu møguleikar at mennast.
Við greiðari raðfesting, samstarvi við fakfólk og dirvi til at finna nýggjar loysnir, kunnu vit skapa eitt sterkari heilsuverk og eitt betri samfelag fyri øll.
Tað er ein íløga í bæði menniskju og framtíð okkara.
X við Martin Drangberg
X við Sambandsflokkin
