Upp undir Mentanarnáttina, hósdagin 4. juni kl. 16, letur listakvinnan Ingun Hansen framsýning upp í Snarskivuni.
Ingun Hansen búði í Havn, til hon var 10 ára gomul, tá hon flutti til Danmarkar saman við foreldrum og systkjum. Síðani hevur hon búð har. Sína listaligu útbúgving hevur Ingun nomið sær á Århus Kunstakademi árini 1988-92 og á Det fynske Akademi 1992-96.
Ingun hevur luttikið í fleiri framsýningum, bæði í Danmark og Føroyum, millum annað tríggjar ferðir í várframsýningum hjá Listasavninum og eisini saman við øðrum donskum listafólkum í Listasavninum.
Umframt at vera virkin listakvinna starvast Ingun sum sjúkrarøktarfrøðingur, og soleiðis er eisini í summar, nú hon er tríggjar mánaðir í Føroyum. Hon býr í Hvalba og arbeiðir sum listakvinna har, umframt at hon starvast nakrar tímar um vikuna hjá Nærverkinum.
- Hetta er ein góð samanseting og góður møguleiki at koma í samband við fólk, sigur Ingun Hansen.
Myndirnar á framsýningini í Snarskivuni eru abstraktar, bæði oljumálningar og vatnlitsmyndir. Nakrar eru málaðar í ár og aðrar eru eldri. Íblásturin fær Ingun m.a. úr náttúruni, bæði tí føroysku og donsku.
Øll eru vælkomin til fernisering í Snarskivuni hósdagin 4. juni 2009 kl. 16
