Hósdagin 6. januar, trettanda dag jóla í 2022, varð Árni Skaale úr Klaksvík av Bárði á Steig Nielsen løgmanni útnevndur at vera landsstýrismaður í fiskivinnumálum. Hann er 21. landsstýrismaðurin í fiskivinnumálum, tá ið sæð verður burtur frá løgmonnunum, sum í ein ella fleiri dagar hava umsitið málsøkið, eftir at ein hevur lagt frá sær, og til ein annar tók við.
Frá tí at fyrsta landsstýrið varð skipað í mai 1948 og fram til og við triðja landsstýrið, sum legði frá sær eftir valið í 1958, var ikki ásett hvørji málsøki hvør landsstýrismaður umsat.
Fyrsti landsstýrismaður í fiskivinnumálum var Kristian Djurhuus úr Sambandsflokkinum, sum umsat málsøkið 1959 – 1962, tá ið Petur Mohr Dam var løgmaður, og sum aftur umsat málsøkið í nýggjari heimastýrissamgongu 1967 – 1968, inntil hann, eftir at Petur Mohr Dam var deyður 8. november 1968, tók við sum løgmaður.
Árni Skaale er sjeyndi fólkafloksmaðurin at røkja henda sessin. Seks sambandsmenn hava verið landsstýrismenn í fiskivinnumálum, fimm tjóðveldismenn og tríggir javnaðarmenn. Tað eru bara menn, sum hesin sessurin higartil er litin til.
Jacob Vestergaard, sum undan jólum legði frá sær, er hann, ið nógv longst hevur sitið í landsstýrissessinum í fiskivinnumálum. Hann hevur í fýra umførum umsitið fiskivinnumál í umleið 11 ár.
Umframt Jacob Vestergaard eru tað bara tríggir, sum hava umsitið fiskivinnumál í meiri enn fýra ár. Teir eru Kristian Djurhuus, Atli P. Dam, sum umsat málsøkið í tveimum umførum – seinnu ferðina var hann eisini løgmaður – og John Petersen, sum umsat málsøkið í tveimum umførum.
Landsstýrismenn í fiskivinnumálum
Kristian Djurhuus B | 1959 – 1962, 1967 – 1968 | 6 |
Erlendur Patursson E | 1963 – 1966 | 4 |
Villi Sørensen C | 1969 | 1 |
Atli P. Dam C | 1970, 1985 – 1988 | 5 |
Eli Nolsøe B | 1971 – 1974 | 4 |
Petur Reinert E | 1975 – 1978 | 4 |
Heðin M. Klein E | 1979 – 1980 | 2 |
Olaf Olsen A | 1981 – 1982 | 2 |
Anfinn Kallsberg A | 1983 – 1984, 1989 | 2 |
Jógvan I. Olsen B | 1989 – 1990 | 2 |
John Petersen A | 1991 – 1993, 1996 – 1998 | 5 |
Thomas Arabo C | 1993 – 1994 | 2 |
Ivan Johannesen B | 1994 – 1996 | 2 |
Jørgen Niclasen A | 1999 – 2002 | 4 |
Jacob Vestergaard A | 2003, 2008 – 2011, 2012 – 2015, 2019 – 2021 | 11 |
Johan Dahl B | 2008, 2011 | 7 mðr |
Bjørn Kalsø B | 2004 – 2008 | 4 |
Tórbjørn Jacobsen E | 2008 | 6 mðr |
Jákup Mikkelsen A | 2011 | 3 mðr |
Høgni Hoydal E | 2015 – 2019 | 4 |
Árni Skaale A | 2022 – | |
A | 7 | |
B | 6 | |
C | 3 | |
D | 0 | |
E | 5 | |
F | 0 | |
H | 0 |