Kvívíkingur tikin á heimabeiti av argjamonnum

Í fýra teimum fyrstu róðrunum í ár hevur Kvívíkingur verið fremstur í hesi kappingini. Sein­astu ferðirnar hava sigrarnir ikki verið so sannførandi, sum teir vóru fyrr í summar, og tí kundi tað bent á, at annar vinnari kundi bjóða seg fram.
Og soleiðis var tað leygar­dagin.
Í fjør var Argjabáturin full­komuliga suverenur í hesi kapp­ingini. Í fýra teimum fyrstu róðr­unum í ár hevur nýggja mann­ingin umborð á Argja­bátinum ligið framvið, uttan at tað hevur eydnast at vinna. Kvívíkingur hevur vunnið hvørja ferð, og Argja­báturin hevur verið nummar tvey hvørja ferð – uttan á Skálafjørðinum, tá ið Fríggjarin stakk seg fram ímillum Kví­víking og Argjabátin.
Tíðarmunurin frá Kví­vík­ingi og til Argjabátin var á Norð­oyastevnu trý sekund. Í Sunda­lagnum var hann minni enn eitt hálvt sekund, á Eystan­stevnu var hann trý sekdund, og á Jóansøku var hann eitt sekund.
Tí var tað ikki púra óvænt­að, at Argjabáturin sýndi so sann­førandi avrik í Vest­manna:
Argjabáturin brendi seg fram um kappingarneytarnar beinanvegin, og Argjabátuin stýrdi kappingini allan 1000 metra teinin.
Sum fleiri ferðir fyrr í summar var Kvívík­ing­ur ikki millum teir fremstu beinan­vegin. Kvívík­ing­ar plaga tó at orna para­graff­ir­nar, men tað megn­aðu teir ikki leyg­ar­dagin.
Argjabáturin var ongantíð hóttur í endaspurtinum, og at hetta ikki var dagurin hjá kví­víkingum, sum hvønn dag fyrireika seg til kappingarnar í Vestmanna, varð undirstrikað við, at eisini Fríggjarin úr Mið­vági setti Kvívíking upp á pláss.
Kvívíkingur megnaði á triðja plássi akkurát at vinna á Árn­firðingi, sum aftur hesa ferð var við til at seta dám á kappingina á fyrsta partinum av teininum. Báðir bátarnir úr høvuðsstaðnum kappaðust um at sleppa undan aftastu brík. Ta kappingina vann Ørvur á Knørri.
Úrslitið ber við sær, at tað er komið eitt sindur av spenn­ingi í FM kappingina, men tað skal kortini vilja illa til hjá kvívíkingum á Vestan­stevnu í Sørvági og 28. juli, um teir ikki á Ólavsøku skulu standa við FM heitinum.

1 Argjabáturin 04:34.16
2 Fríggjarin 04:36.00
3 Kvívíkingur 04:37.09
4 Árnfirðingur 04:38.23
5 Knørrur 04:43.06
6 Ørvur 04:49.04

Støðan
1 Kvívíkingur 33
2 Argjabáturin 30
3 Fríggjarin 25
4 Árnfirðingur 22
5 Ørvur 13
6 Knørrur 12