Nógv fólk hava givið til kennar, at blaðið er nógv saknað av teimum, sum lósu tað. Blaðið hevði eitt fjølbroytt innihald, og millum tað best umtókta tilfarið var ein fastur siðsøguligur táttur, har serligur dentur varð lagdur á frásøgur um lívið hjá føroyingum, sum tað hevur verið í farnum døgum. Fyrst og fremst hevur verið talan um at lýsa viðurskifti hjá fiskimonnum og teirra heimum. Men annars hava frásagnirnar verið sera fjølbroyttar. Hetta hevur verið gjørt við samrøðum við gomul fólk og við endurprenting av gomlum handritum, sum ikki hava verið frammi fyrr.
Ætlanin er, at Sosialurin skal taka hendan táttin upp eftir FF-blaðnum, og kemur Óli Jacobsen at skipa fyri honum.
Hetta verður gjørt í einum serligum tátti í blaðnum mikudagar, kallaður »Miðvikan«, har tað eins og í FF-blaðnum verða fýra samanhangandi síður, sum kunnu takast úr blaðnum og goymast.
Ætlanin er at byrja hendan táttin komandi mikudag. Í trimum teimum fyrstu mikudøgunum verður framhald av frásøgnini hjá tí 100 ára gamla Andrias í Tarti úr Oyndarfirði.
Undan ársskiftinum vóru fyrstu fimm partarnir av hansara sera áhugaverdu frásøgn um eitt langt lív á sjónum, har hann eisini greiðir frá lívinum heima, í FF-blaðnum. Frásøgnin er merkt av einum ótrúligum minni, sum veruliga gevur okkum eina livandi mynd av, hvussu nógv tilveran er broytt hesi 100 árini, hann hevur livað. Hesir fimm partarnir kunnu finnast á heimasíðuni:
www.fiskimannafelag.fo
Blaðnumrini eru 375-379. Bløðini kunnu finnast sum pdf fílar, ella sum einstakar greinir, sum eru lættar at finna fram.
Tað eru tríggir partar eftir av hesi frásøgn, og teir verða sum sagt prentaðir fylgjandi tríggjar mikudagarnar.
Tá tað snýr seg um siðsøgu er ørgrynna av tilfari, sum bert skal »finnast« og síðan gerast til lesiligt tilfar. Sum dømi um tað tilfar, sum arbeitt verður við, er frásøgn frá teimum knapt 90 og 94 ára gomlu hjúnunum Kristinu Sofíu, Dinnifíu, og Jógvan Sofus Ferjá úr Gjógv. Dinnifía hevur eins og Andrias í Tarti eitt ótrúligt minni og Jógvan Sofus hevur verið til sjós alt sítt arbeiðslív. Sumt av tí hjá Jógvan Sofus er niðurskrivað og almannakunngjørt, men at fáa gjørt tað sama við vitanina hjá Dinnifíu er eisini sera týdnngarmikið, so hennara lívsroyndir kunnu verða varðveittar. Hetta kann lesarin gleða seg til.
Á skránni er eisini ein samrøða við Tórhall Andreassen, ættaður frá Norðskála. Pápin og abbin vóru fiskimenn, og tey vóru 14 systkin. Av hesum vóru 8 brøður, sum eisini gjørdust sjómenn, og fimm av teimum gjørdust skiparar. Ein av teimum var Tórhallur, sum eisini hevur upplivað dramatikk á sjónum, men alt hetta koma vit at lesa meira um.
Tað finst eisini annað áhugavert tilfar, sum hevur verið í FF-blaðnum, og sum saktans tolir at verða endurprentað.
2. jóladag eru liðin 100 ár síðan tjóðangurin »Tú alfagra land mítt« við lagnum hjá Petur Alberg fyrstu ferð varð framførdur í Sloans sali við Tinghúsvegin. Í hesum sambandi kundi tað verið eitt hugskot at endurgeva tær stak áhugaverdu dagbøkur, ið Petur skrivaði sum drongur árini 1898-1901. Her lýsir hann lívið í Havn, í Føroyum annars og eisini úti í heimi við eygunum hjá einum 12-15 ára gomlum dreingi, men hann ger tað við einum búnaskapi, sum hjá einum tilkomnum persóni.
Annars er FF-blaðið einasta blað, sum hevur prentað áhugaverdu og eisini stuttligu frásøgnina hjá Petur Alberg sjálvum um, tá lagið varð til. Henda frásøgn er eisini viðkomandi til 100 ára haldið.
Vit vænta okkum nógv av hesum táttinum, og hava lesarar uppskot til evni at taka upp kunnu teir altíð siga blaðnum frá.
