Sunnudagin tók liðið hjá Hákuni West av Teigum, Füchse Berlin móti Erlangen í dysti í bundesliguni.
Tað eydnaðist Füchse Berlin frammanfyri 8.500 áskoðarum í Max Schmelling høllini í Berlin at vinna greiðan 39-32 sigur. Füchse Berlin var á odda 20-15 í steðginum.
Matthias Gidsel var stórskjútti við 14 málum, og hálvi trongisvágsmaðurin, Hans Lindberg gjørdi tað eisini væl við at skjóta átta mál.
Füchse Berlin er fremst í deildini við 41 stigum, trý stig frammanfyri Magdeburg, ið tó hevur spælt ein dyst færri.
Nummar trý er liðið hjá Jóhan á Plógv Hansen, Flensburg Handewitt við 35 stigum. Nummar fýra er liðið hjá Eliasi Ellefsen á Skipagøtu, THW Kiel við 34 stigum.
Týskvøldið klokkan 19.45 spælir Füchse Berlin aftur dyst á heimavølli. Hesaferð móti rumenska liðnum, Constanta í EHF European League.
##med2##
