Hørður H. Askham var aftur í eldinum fyri AB í triðbestu donsku fótbóltsdeildini í dag.
Tað var ein uppgerð millum tvey søgurík lið í donskum fótbólti, tá AB við Hørði við á liðnum frá byrjan tók ímóti Fremad Amager.
Tað eydnaðist AB at vinna dystin 2-0.
Tim Freriks gjørdist stóra hetjan hjá AB í dag. Longu í triðja minutti legði hann heimaliðið á odda, og tá 28 minuttir vóru leiktir økti hann til 2-0.
Tað eydnaðist AB at halda tætt, og aftaná tvey tap á rað kom ein kærkomin sigur í hús.
AB er nummar seks í deildini við níggju stigum fyri sjey dystir. Níggju stig eru upp til oddaliðið, Esbjerg sum hevur 18 stig.
Komandi leygardag spælir AB á útivølli móti Middelfart.