Uppskotið um at dagføra føroysku rættargangslógina er nú sent í hoyring. Tað fevnir um broytingar, sum eru gjørdar í donsku rættargangslógini frá januar 2023 til juni 2025, og sum danska løgmálaráðið og landsstýrið meta eisini eiga at galda í Føroyum.
Ein av mest ítøkiligu broytingunum er, at løgreglan kann fáa heimild at samanbera DNA-spor frá einum brotsstaði við upplýsingar í DNA-grundaðum ættargranskingardátugrunnum.
Slíkir dátugrunnar verða vanliga brúktir av privatfólki, sum vilja finna skyldfólk ella kanna sína ætt.
Endamálið hjá løgregluni verður at finna skyldfólk hjá einum møguligum brotsmanni og á tann hátt spora seg fram til tann, sum hevur framt brotsverkið.
Amboðið skal bara kunna brúkast í serliga álvarsligum málum, eitt nú málum um yvirgang, neyðtøku, fólkadráp og onnur sera álvarslig brotsverk. Harumframt skal kanningarstigið metast at hava avgerandi týdning fyri málið.
##med2##
