Sidney Tower er eitt av teimum best umtóktu ferðavinnumálunum í avstralska býnum Sidney, og eisini í gjár vóru nógv fólk uppi í torninum og nutu útsýnið.
Klokkan sjey í gjárkvøldið fekk løgreglan boð um, at ein av lyftunum í torninum var steðgað 200 metrar uppi, og at 11 fólk sótu føst har.
Bjargingarliðini noyddust at taka tey 11 fólkini upp ígjøgnum takið á lyftuni, og tey sluppu so niður á jørðina við hinum báðum lyftunum, sum eru í torninum. Men tá høvdu summi av teimum 11 sitið fýra tímar føst í lyftuni.
Avstralska løgreglan sigur við blaðið The Australian, at tey 11 óhepnu ferðafólkini høvdu tað gott, tá tey komu niðuraftur.
Tað er ikki greitt, hví lyftan steðgaði.
