Sambært AFP hevur Iran boðað frá, at landið ætlar at krevja gjøld frá skipum, sum fara gjøgnum sundið. Pengarnir skulu millum annað nýtast sum endurgjald fyri skaðar, sum Iran hevur fingið undir krígnum móti USA.
Boðini koma dagin eftir, at USA og Iran kunngjørdu eina friðaravtalu, sum skal enda kríggið, ið byrjaði 28. februar, tá USA og Ísrael framdu álop á Iran.
Macron heldur fast við, at iranska kjarnorkuskráin skal avmarkast. Hann sigur, at uran í Iran eigur annaðhvørt at verða flutt úr landinum ella útvatnað og síðan havt undir eftirliti hjá Altjóða Kjarnorkustovninum, IAEA.
Sambært franska forsetanum eru Frakland og Bretland til reiðar at leiða eina altjóða verkætlan í Hormuzsundinum saman við Hollandi og Italia. Endamálið er at tryggja fría sigling og at fáa siglingina gjøgnum sundið aftur í vanliga legu.
Danmark hevur eisini boðað frá, at landið er til reiðar at stuðla arbeiðinum fyri at tryggja fría sigling. Uttanríkisráðharrin, Lars Løkke Rasmussen, segði mánadagin, at Danmark er sinnað at lata sítt íkast undir røttu umstøðum.
Hormuzsundið er ein av týdningarmestu siglingarleiðunum í heiminum, og ein stórur partur av heimsins oljuflutningi fer gjøgnum sundið.
