Í morgun hava børnini í barnagarðinum í Kvívík verið á Barnafestivali í Havn. Men hóast barnafestivalurin er ókeypis, gjørdist hetta ein rættiliga dýr ferð hjá børnunum.
Strandferðslan hevur sett sparingar í verk og tað merkir, at nú verða eykabussar ikki longur settir í koyring, tá ið tað annars er neyðugt. Sostatt mugu fólk laga seg til ferðaætlanina, men er brúk fyri eyka bussi, mugu ferðafólkini rindar fullan prís fyri bussin.
- Vit vóru 26 børn og seks vaksin úr barnagarðinum í Kvívík, sum skuldu fara á barnafestival í Norðurlandahúsinum í Havn, sigur Siborg Arge, leiðari í Barnagarðinum.
- Men bussurin, sum vanliga koyrir á rutuni, tekur bara 28 fólk, so tá ið vit bíløgdu pláss fyri nøkrum døgum síðani, fingu vit at vita frá Strandferðsluni, at tað var ikki pláss fyri okkum í bussinum.
Tískil var einasti útvegur at vit leigaðu buss og rindaðu fullan prís fyri hann, sigur Siborg Arge.
Avleiðingin av tí var, at barnagarðurin í Kvívík máttu leiga buss frá Strandferðsluni og sostatt kostaði tað 2600 krónur hjá børnunum á sleppa til Havnar á eitt tiltak, sum annars var ókeypis.
Siborg Arge sigur, at tey høvdu lovað børnunum at sleppa á barnafestival og tað lyftið vildu tey ikki bróta. Tí rindaði dagstovnurin hesa rokningina. Men hon staðfestir, at hetta nýggja sparitiltakið hjá Strandferðsluni, fer at raka tey hart.
- Vit hava ikki lagt upp fyri hesum eykaútreiðslum í okkara fíggjarætlan. So avleiðingin er, at antin mugu vit avmarka okkara útferðir, ella mugu foreldrini í nógv størri mun enn nú rinda kostnaðin sjálvi, sigur hon.
Tað heldur hon er spell, tí onkuntíð hava børnini tørv á øðrvísi upplivilsum og so noyðast tey sum oftast av bygdini, men tað verðu rættiliga tvørligt hereftir, sigur Siborg Arge.
Um eina løtu hava vit eisini eina viðmerking frá stjóranum á Strandferðsluni.
|
