Týski samveldiskanslarin, Friedrich Merz, fer hósdagin í næstu viku at hitta amerikanska forsetan, Donald Trump, í Washington D.C.
Tað upplýsti talsmaðurin hjá týsku stjórnini, Stefan Kornelius, leygardagin, skrivar AFP.
Hetta verður fyrstu ferð, at Merz vitjar í USA, síðani hann tók við sum kanslari fyrst í mai.
Samrøðurnar millum Trump og Merz fara at snúgva seg um viðurskiftini millum londini, og "russiska álopsstríðið móti Ukraina, støðan í Miðeystri og handilspolitikkur" verður á skránni.
Sambært týsku tíðindastovuni dpa upplýsti talsmaðurin eisini, at Friedrich Merz fer til Washington D.C.
Hósdagin skulu teir báðir leiðararnir eftir ætlan hittast í Hvítu Húsunum, eta ein felags døgurða og síðani halda eitt tíðindatiltak.
Vitjanin kemur samstundis sum amerikanski forsetin hevur gjørt eina røð av tollfráboðanum mótvegis londum kring heimin.
Seinast boðaði hann leygarnáttina frá, at innflutningsgjøldini á stáli og aluminium hækkaðu úr 25 prosentum upp í 50 prosent.
Tann 2. apríl kunngjørdi hann ein lista við ymiskum tolli - sonevndum sínamillum tolli - ætlaður vørum úr útlondum.
Hann steðgaði síðani tollinum í 90 dagar, og síðani varð ein lægri grundtollur uppá tíggju prosent galdandi fyri flestu lond.
Fyrr í vikuni segði Merz, at ES aftur kann koma við átøkum, sum eru ætlað amerikanskum tøknifyritøkum ella øðrum tolli, um handilsstríðið tvørtur um Atlantiska økið økist.
- Vit skulu ikki reagera ekkaleys og hektiskt.
- Men kunnu vit ikki gera annað, noyðast vit at brúka hetta amboðið, segði Merz á WDR Europaforum-ráðstevnuni, sambært AFP.
Viðvíkjandi krígnum í Ukraina hevur Trump lagt trýst á báðar partar fyri at enda kríggið, sum byrjaði við, at Russland í februar 2022 herjaði grannalandið við fullari styrki.
Trump er farin at vísa ivasemi um, hvørt russiski forsetin, Vladimir Putin, veruliga vil enda kríggið.
Hann skrivaði fyri stuttum á sínum egna sosiala miðli, Truth Social, at Putin er "blivin ørur."
Fyrr í vikuni boðaði Friedrich Merz frá, at Týskland fer at hjálpa Ukraina at menna langtrøkkandi vápn, sum kunnu raka mál á russiskum øki. Hetta hendi á einum felags tíðindafundi við ukrainska forsetan, Volodymyr Zelenskij.
/Ritzau/
