Landsstýrið ætlar at broyta stuðulsskipanina til nýbygging av bústøðum.
Í staðin fyri verandi rentustuðul verður sett í verk ein tíðaravmarkað skipan, har fólk kunnu fáa mvg aftur í sambandi við nýbygging.
Sambært ólavsøkufrágreiðingini verður skipanin avmarkað bæði viðvíkjandi stødd og hægstu upphædd, sum kann latast aftur.
Endamálið er greitt.
– At stimbra bygging av nýggjum búeindum og harvið økja um útboðið av bústøðum, skrivar landsstýrið.
Bústaðarmarknaðurin hevur í fleiri ár verið undir trýsti, serliga í miðstaðarøkinum, og landsstýrið metir, at størri útboð er ein fortreyt fyri at fáa javnvág á marknaðin.
Samstundis verður skatturin av sølu av fastogn endurskoðaður. Landsstýrið sigur, at endamálið við hesum er at tálma spekulatión í bústøðum.
