Næstan 1000 fólk eru deyð í einum herviligum vatnfloymi, sum seinastu dagarnar hevur rakt syðra part av Asia.
Útlendskir miðlar vita at siga, at talið er deyðum eftir floym og skriðulop er vaksið nógv seinastu dagarnar.
Tað var eftir, at eitt tropiskt ódnarveður hevði rakt Malakkasundið, at tað fór at regna illa,og fleiri skriðulop vóru.
Sagt verður, at hetta er ringasti vatnfloymur, sum hevur rakt londini her eysturi í nógv ár.
Talið av deyðum í Indonesia, Sri Lanka og Tailandi nærkast nú 1000, og fleiri hundrað fólk eru framvegis saknað.
Tískil er eisini væntandi, at talið av deyðum fer at veksa.
Myndugleikarnir í Indonesia siga, at talið av deyðum á oynni Sumatra er stívliga 400, og her eru framvegis fleiri enn 400 saknað.
Á oynni hava eisini næstan 650 fólk fingið løstir.
Sagt verður, at neyðhálparfólk hava havt trupult við at komið fram til partar av oynni, og trot er á neyðsynjarvørum.
Á Sri Laka er talið av deyðum komið upp á 334, og her eru framvegis fleiri enn 400 saknað.
Í Tailandi eru fráboðanir um, at í minast lagi 160 fólk hava latið lív, og fráboðanir eru eisini um fleiri deyðsføll í Malaysia.
- Stór økir liggja undir í vatni, og fólk sita á tøkum, eins og heil lokalsamfeløg eru avskorin frá umheiminum av floymi og lopum.
Hetta veit www.tv2.no at siga í dag.
