Síðani Nikolaj Jacobsen tók við sum landsliðsvenjari hjá danska hondbóltsliðnum í 2017, hevur hann ført liðið til sigur eftir sigur.
Nógvir venjarar, sum uppliva viðgongd, halda seg ofta til sín máta at gera tingini uppá. Men eitt tað sterkasta avrikið hjá Nikolaj Jacobsen hevur verið hansara evni at fylgja við tíðini og laga tilgongdina til leikararnar.
Tað halda nakrir av landsliðsleikarunum, sum kenna 54 ára gamla venjaran sera væl.
– Tað skal eingin ivi vera um, at hann hevur stórt temperamang, og tað veit hann sjálvur. Tað er eisini tað, sum hevur ført okkum har vit eru, sigur spælarin Rasmus Lauge.
– Nú ivast hann heldur ikki í, hvussu svangir vit allir eru, so hann kann nokk føla, at tað ikki er sami tørvur á skideballum.
Sum spælari hevði Nikolaj Jacobsen stórt temperamang. Tað tók hann eisini við sær inn í sína venjarayrkisleið, har hvørki leikarar, fjepparar ella hyggjarar eru í um temperaturin í hansara hugburði undir einum dysti.
Hann fer ongantíð at gevast við hasum. Tað vilja leikararnir heldur ikki, tí hansara høgu krøv til seg sjálvan, leikararnar og umhvørvið eru tað, sum hjálpir til at halda verkætlanini í framgongd.
Men vreiði hansara er sjáldan vend móti nøkrum serligum.
– Tú gerst klókari við aldrinum, og eg hugsi eisini um tey tingini, sum eg geri. Eg kann rópa og blíva svakur úti á beinkinum, men tá er tað nokk meira fyri meg sjálvan heldur enn tað er vent móti nøkrum, sigur Nikolaj Jacobsen sjálvur.
Tað kann Mads Mensah væl kenna aftur. Um nakar, so hevur hann fylgt Nikolaj Jacobsen í síni yrkisleið.
Tá Nikolaj Jacobsen byrjaði sína høvuðsvenjarayrkisleið í Aalborg Håndbold í 2012, var tað við Mensah á liðnum. Og tá Nikolaj Jacobsen tvey ár seinni fór til týska Rhein-Neckar Löwen, tók hann Mensah við sær.
Hann hevur fylgt væl við gongdini hjá Nikolaj Jacobsen sum venjari.
– Nikolaj er vorðin nógv róligari. Hann veit eisini, at hann venur eitt annað slag av leikara nú enn tá hann kom inn. Og enn meira enn tá hann sjálvur spældi, sigur Mensah.
– Tað er rættiliga umráðandi at vera tilvitaður um hetta. Skalt tú framhaldandi hava ávirkan og røkka tínum spælarum, mást tú møta teimum har teir eru. Tað eru ikki bara teir, sum skulu møta venjaranum.
Sambært bakkinum, sum nú spælir við Skjern í donsku kappingini, hevur landsliðsvenjarin, hóast bagasjuna úr "gamla skúlanum", megnað at tillagað seg soleiðis, at hann fungerar í "nýggja skúlanum" við hesum ættarliðnum av spælarum og teirra áskoðan á hondbóltslívið.
Taktisku evni hansara og einastandandi fatan av hondbólti kann ikki setast á blað. Soleiðis hevur eisini verið hjá øðrum venjarum gjøgnum tíðina, men teirra áheitan um at halda seg til okkurt, sum einaferð riggaði, hevur fingið tíðina at renna undan teimum.
Sambært Mads Menseh er Nikolaj Jacobsen ikki dottin í ta felluna.
– Hann hevur altíð verið heitur og havt ringan humor. Tann parturin er enn intaktur, og hann er enn sín egni. Men tað er hansara ynski um at fylgja við, sum er tað týdningarmesta, sigur hann.
Nikolaj Jacobsen hevur staðið á odda fyri Danmark í 11 finaluumførum tvørtur um OL, HM og EM. Níggju ferðir er tað endað við heiðursmerki.
Í dag klokkan 17 spæla Danmark og Týskland finaluna í EM endaspælinum í Boxen í Herning. TV2 sendir dystin beinleiðis í sjónvarpi.
/Ritzau/
