Hóast ymisk sjónarmið, so valdar nú rímulig semja um, at vit skulu royna at manna nevndir og ráð so nøkulunda javnt við báðum kynum. Í politikki er ringt at seta kvotu á, tí soleiðis sum okkara demokratiska valskipan er skrúvað saman, so ber tað ikki til. Tí hvílir ein nógv størri ábyrgd á flokkunum um at skipa uppstillingina soleiðis, at bæði kynini hava sama rætt at verða vald.
Í fjør høvdu vit kjak um valskipanina – tað mundi verði meiriluti fyri at broytt valskipanina aftur í valdømi, soleiðis at vit fingu tryggjað »økisjavnstøðu«.
Eitt slíkt sjónarmið kann sjálvandi hava fólkaræðisligar grundgevingar. Men tá Edmund Joensen legði uppskotið um eitt valdømi fram stutt undan síðsta løgtingsvali var grundgevingin júst, at hetta fór at skapa størri javnstøðu á tingi. Tað er sjálvandi trupult at prógva, men vit kunnu so siga, at øll fólk í Føroyum við hesi skipan hava sama møguleika at velja ímillum øll valevnini, sum bjóða seg fram.
Hetta við »økiskvotering« móti »kynskvotering« er áhugavert, ikki minst grundgevingarnar: Tá til dømis ein sandingur skal veljast á ting, tí hann er sandingur. Hví skal so ein kvinna ikki veljast á ting, tí hon er ein kvinna?
Men sum vit hava sagt so mangan fyrr: Skulu kvinnur hava vald, so skulu menn missa vald, og tað er sera trupult hjá monnum at avgeva vald uttan svørðslag.
Jóannes Eidesgaard skemtaði við, at hann var løgmaður í seinasta taliban-landsstýrinum – seinasta landsstýri uttan kvinnur. Tað fáa vit valla aftur, tíbetur.
Men tað ber altso væl til at fáa javnstøðu á tingi - tað vil siga á leið líka nógvar kvinnur sum menn – uttan at gera tað við formellum kynskvoteringum. Fýra menn kunnu gera hetta einsamallir: Um Høgni Hoydal, Kaj Leo Johannesen, Jørgen Niclasen og Aksel V. Johannesen gera av, at í teirra flokkum vilja teir hava á leið eins nógvar kvinnur valdar, sum menn, so er trupulleikin loystur. Tað er í floksorganisatiónunum, at hetta skal skipast – og sum leiðarar í fýra av teimum størstu flokkunum, so hava teir buktina og báðar endarnar – spurningurin er so bara, um teir tora at sleppa øðrum endanum?
