Men soleiðis sum vit hátta okkum – bæði yvir fyri egnum læknaligum myndugleikum, móti útlendingum, sum ikki duga at skilja hesa mentan okkara – og ikki minst móti okkara egnu vísindafólkum, so skapa vit fortreytirnar soleiðis, at tað helst ikki kann enda við øðrum enn, at grindadrápið fer í søguna.
Tað nyttar einki, at vit siga, at soleiðis hava vit gjøt í túsund ár, tí um vit ikki kunnu leggja prógv á borðið um, at veiðan er burðardygg, so kann alt gera tað sama. Og tað nyttar ikki at gera sum í fiskivinnuni, at grindamenn vita best, tí tað gera teir als ikki. Eingin veit, hvussu stórur stovnurin er, og tí er tað av størsta týdningi, at hann verður kannaður.
Bjarni Mikkelsen, sum er lívfrøðingur á Náttúrugripasavninum sigur í blaðnum í dag, at tey hava verið klár í 11 ár við sendarum at seta á eina grind, fyri at kunna kanna, hvussu grindin ferðast. Men tey sleppa ikki. Sýslumenn og grindamenn vilja ikki lata náttúrugripasavni fáa eina heila grind at merkja, fyri síðani at sleppa øllum hvalunum útaftur. Atlitið fyri lakaíløtunum og grýtunum er størri, enn fyri at veita vísindunum ta hjálp, sum kundi bjargað okkum hendan partin av mentanini, so grindadrápið ikki fór í søguna, tí at onnur halda okkum veiða hótt djóraslag.
Men hetta er kanska føroyska samfelagið í einum nøtuhylki: Eingin skal koma her og siga okkum, hvar skápið skal standa. Tað vita vit best sjálvir...
Og Bjarni Mikkelsen hevur eitt gott poeng, táhann sigur, at við at gera meira burtur úr at granska grind, so kann tað vera ein góður trumfur mótvegis umhvørvisfelagsskapum. Á tann hátt kunnu vit vísa teimum, at vit ikki bara drepa grind, men at vit eisini granska í grindini.
Tað kann so bara gagna okkum, at vit taka slík stig, sum gevur okkum vælvild úti í heimi. Ikki minst nú, tá fleiri umhvørvisfelagsskapir hava boðað frá, at teir ætla sær higar í summar. Og teir høvdu heilt víst tikið tað eitt sindur róligari, um tey tíðindi nú bórust, at føroyingar hava slept eini heilari grind útaftur – við sendarum – til granskingarendamál.
Eitt er vist, eingin fer at granska grindina fyri okkum. Gera vit tað ikki sjálv, so verður tað ikki gjørt. Og verður tað ikki gjørt, so verður tað orsøkin til, at grindadrápið um fá ár fer í søguna.
