Styttið arbeiðsvikuna við lóg!

Ikki hissini ágangur, sum uppskotið um at stytta arbeiðsvikuna hjá føroyingum fær.

Tað er bara ein møguleiki at stytta ar­beiðs­vik­una í Føroyum. Og tað er at gera, sum vit al­tíð hava gjørt, við lóg at stytta ar­beiðs­vik­una.

At arbeiðsgevarar hveppast við er sín søk, tí tað kostar teimum pengar. Verka­fólk og fak­fel­øg taka sjálvandi undir við ein­um slíkum uppskoti. Tí var tað ikki sørt marg­háttligt at hoyra formanninum í Skip­ara- og Navigatørfelagnum tosa í­móti upp­skot­i­num herfyri og tosa søk ar­beiðs­gev­a­r­anna heldur enn søk verkafólksins og fakfelaganna.

Tað er eisini margháttligt at hoyra borg­ar­stjór­ar tosa ímóti at stytta ar­beiðs­vik­una og har­við tosa ímóti á­hug­a­mál­i­num hjá ar­beiðs­gevara sínum, fólkinum, veljar­u­num.

Men at fyrigykla fólki, at tað eru part­ar­nir á arbeiðsmarknaðinum, sum í sam­ráð­ing­um um løn eiga at stytta arbeiðsvikuna, tað er fullkomiliga misskilt. Tí tað hendir ikki og er ikki hent.

Vit kunnu taka sum dømi, tá ar­beiðs­vik­an var stytt úr 48 tímum niður í 44 tímar. Tað var gjørt við lóg í 1964, tá Hákun Djurhuus, for­mað­ur Fólkafloksins, var løgmaður. Tað var gjørt púra greitt í lógini,  at arbeiðsvikan varð stytt – uttan at tað skuldi føra til løn­ar­lækk­ing. Løntakarin skuldi hava somu løn fyri 44 tíma arbeiðsviku, sum hann fekk fyri 48 tíma arbeiðsviku, og tímalønin skuldi síðani hækka tilsvarandi.

Í 1970 samtykti Løgtingið at stytta arbeiðsvikuna úr 44 tímum niður í 42,5 tímar, og í 1978 samtykti Løgtingið enn eina­ferð at stytta arbeiðsvikuna við lóg. Hesa­ferð varð arbeiðsvikan stytt frá 42,5 til 40 tím­ar – í báðum førum aftur uttan at tað skuldi ávirka løn­ina, og aftur var tímalønin hækkað til­svar­andi. Í 1970 sótu Javnaðarflokkurin, Sambandsflokkurin og Sjálvstýrísflokkuriní landsstýrinum, Kristian Djurhuus úr Sambandsflokkinum var løgmaður. Í 1978 sat Javnaðarflokkurin við borðendan í Tinganesi saman við Fólka­flokk­inum og Tjóðveldisflokkinum.

##med2##

Borgarliga samgongan í 2011 kollvelti priv­atu pensjónsskipanirnar við at for­skatta pensjónirnar. Tað var eisini gjørt utt­an um partarnar á arbeiðsmarknaðinum.

Nú er tað ein spurningur, um ar­beiðs­vik­an skal styttast niður í 37 tímar. Partarnir á ar­beiðs­marknaðinum gera tað ikki – og tað skulu teir ikki, og tað plaga teir ikki. Tað er Løgtingið sum eigur uppgávuna at stytta arbeiðsvikuna. Vit kunnu vera ósamd um at stytta arbeiðsvikuna. Men tað er søguliga prógvað, at Løgtingið eigur uppgávuna!

TRÝST HER fyri at síggja lógina um 44 tímar arbeiðsviku.

TRÝST HER fyri at síggja lógina um 40 tímar arbeiðsviku

Soleiðis stendur í samgonguskjalinum hjá sitandi samgongu um at stytta arbeiðsvikuna niður í 37 tímar:

»Arbeiðsvikan verður stytt niður í 37 tímar. Trípartasamráðingar verða tiknar upp um at stytta arbeiðsvikuna við einum tíma annaðhvørt ár, til hon er komin niður á 37 tímar. Arbeiðsvikan verður skipað við lóg.«