Øll føroyingaliðini í bestu donsku hondbóltsdeildini taptu

Tað gjørdist ikki ein góður dagur hjá føroyingaliðunum í bestu donsku hondbóltsdeildini hjá kvinnum í dag. 

Brynhild Pállsdóttir, Súna K. Hansen og liðfelagarnir í Ajax taptu í dag á heimavølli sjeynda dystin á rað og hava framvegis einki stig.

Ajax tapti 21-27 fyri Aarhus United. Í stegðinum var Aarhus á odda 12-10. 

Súna skoraði trý mál, legði upp til eitt mál og vann liðnum eitt brotskast. Brynhild skoraði eitt mál. 

Um fjúrtan dagar spælir Ajax móti Keypmannahavn á útivølli.

Føroyski landsliðsleikarin, Pernille Brandenborg og liðfelagarnir í Keypmannahavn taptu í dag 29-35 fyri toppliðnum, Esbjerg á útivølli. Esbjerg var á odda 19-16.

Keypmannahavn er nummar níggju í deildini við seks stigum. 

Pernille skoraði trý mál fyri Keypmannahavn í dag.

Jana Mittún og liðfelagarnir í Viborg taptu stórt 27-40 fyri Ikast á útivølli. Ikast var á odda 18-11 í steðginum.

Viborg spælir móti Silkeborg/Voel á heimavølli um 14 dagar. Viborg er nummar fimm í deildini við seks stigum.

Jana skoraði eitt mál og legði upp til eitt mál.

Í næstbestu deildini taptu Lív S. Poulsen og liðfelagarnir í TMS Ringsted 29-32 (15-16) fyri Hadsten. Lív skoraði tvey mál í dag. 

Ringsted er næstaftast í deildini við ongum stigi. 

Føroysku kvinnurnar fara nú at fyrireika seg til EM-undankappingardystirnar móti Svøríki á útivølli 12. oktober, og móti Íslandi á heimavølli 15. oktober.