Sambært tíðindastovuni AFP leypa russar í dag á býin, Avdijivka, har eystur í Ukraia, við nógvum herfólki.
Tað sigur borgarstjórin í býnum, Vitalij Barabasj.
- Tíverri trýstir fíggindin úr øllum ættum, og tað er ikki friðarligt nakrastaðni í býnum. Teir leypa á okkum við ógvuliga nógvum herfólki, sigur borgarstjórin.
Støðan í Avdijivka er ógvuliga trupul, og russar hava í støðum brotið ígjønum ukrainskar verjuskansar.
Býurin, sum liggur umleið fimm kilometrar frá Donetsk býi, hevur í meira enn fýra mánaðir áhaldandi verið álopin av russum, og eingin bygningur í býnum er heilur.
AFP tíðindastovan veit at siga, at russiskar herdeildir næstan hava kringsett allan býin.
- Eydnast tað russisku deildunum at taka býin, verður hetta eitt undantak, nú skjótt tvey ár eftir, at Russland leyp á Ukraina, skriva útlendskar tíðindastovur.
Sambært borgarstjóranum, Vitalij Barabasj, eru færri enn 950 fólk eftir í Avdijivka, men fyri russisku innrásina hin 24. februar í 2022 búðu umleið 33.000 fólk í býnum.
