Líkt er til, at Neymar nærkast Barcelona, eftir at felag hansara, Santos, boðaði frá, at tað hevur góðtikið tvey boð fyri evnaríka áleyparan.
Santos upplýsti ikki nøvnini á teimum báðum fløgunum, sum hava bjóðað, men hildið verður fyri vist, at talan er um sponsku stórliðini, Barcelona og Real Madrid, har Barcelona altso er mettur sum favorittur.
Í eini fráboðan sigur felagið á sínari heimasíðu: Santos boðar frá, at vit hava fingi tvey boð fyri Neymar da Silva Santos Junior.
Fleiri feløg hava ligið framvið at fáa fatur á evnaríka spælaranum, men nú sær altso út til, at tað verður Barcelona, ið fer avstað við honum, skrivar Daily Mail.
