Týski samveldiskanslarin, Olaf Scholz, umhugsar at ringja til russiska forsetan, Vladimir Putin, áðrenn toppfundin í G20-felagsskapinum verður 18. og 19. november í Brasil.
Hetta skrivar týska miðilin Die Zeit .
Teir báðir leiðararnir hava ikki tosað síðani í desember 2022.
Ongar upplýsingar eru beinanvegin um, hvat Scholz fer at tosa við Putin um.
Men Die Zeit skrivar, at ringir Scholz til Kreml í russiska høvuðsstaðnum, Moskva, so verður hann fyrsti leiðarin í einum av fremstu vesturlendsku londunum, sum stuðla Ukraina, at ringja til Putin í fleiri ár.
Die Zeit skrivar, at miðskeiðis í hesum mánaðinum skal Týskland samráðast um víðari hjálp til Ukraina í stríðnum móti Russlandi.
Í Moskva sigur talsmaðurin hjá Kreml, Dmitrij Peskov, at Russland og Týskland í roynd og veru ikki hava samband longur.
- Tað eru so at siga eingi felags evni at umrøða á yvirflatuni, eins og bilateralu kontaktini eru steðgað, sigur hann sambært Tass.
Men hann leggur afturat, at Putin altíð er til reiðar til dialog.
Peskov sigur, at Russland ikki hevur fingið boð úr Týsklandi um, at tað møguliga er ein telefonsamrøða, sum kemur frá Scholz í týska høvuðsstaðnum, Berlin.
Týska tíðindastovan dpa skrivar, at undir seinastu telefonsamrøðuni hjá teimum báðum leiðarunum í desember 2022 heitti Scholz á Russland um at taka sínar herdeildir úr Ukraina og at ósemjurnar skuldu loysast diplomatiskt.
Putin hevði eina aðra tilgongd til trupulleikarnar. Hann kritiseraði hernaðarhjálpina hjá Vesturheiminum til Ukraina. Sambært Putin hevði henda hjálpin skyldina av, at samráðingarnar ikki eydnaðust.
Stríðið byrjaði 22. februar 2022, tá Russland leyp á Ukraina.
/Ritzau/
