Fýra av teimum fimm monnunum sjólótust, tá franski trolarin Klein Familie sakk hósmorgunin í síðstu viku. Trolarin var úr Cherbourg, og har eru menn ikki í iva um, at tað var farmaskipið Sichem Pandora , sum sigldi trolaran niður, og at skipið helt leiðina fram uttan at steðga. Kanningar av skipinum avdúkaðu reyða máling ein metur niðan fyri vatngangin, og fransmenn halda uppá, at málingin stavar frá trolaranum. Tí hava fronsku myndugleikarnir gjørt av at leggja hald á skipið eftir kravi frá teimum avvarðandi.
Sichem Pandora er skrásett á Malta, men tað er Oslo-felagið Carmillo Eitzem, sum rekur tað. Danska felagið Tesma holding er dótturfelag hjá Carmillo Eitzen, og stjórin í danska felagnum, Claus Thornberg, sigur við Aftenposten, at har hava tey einki ímóti, at málið verður kannað. Hann vísir tó á, at manningin á Sichem Pandora hevur avsannað, at skipið sigldi á franska trolaran.
Fronsku myndugleikarnir hava ikki lagt seg út í málið enn. Teir siga, at teir fara fyrst at bíða eftir kanningunum, sum skulu vísa, um málingin á Sichem Pandora stavar frá Klein Familie . Vrakið av trolaranum skal eisini kannast.
