Áki Berthldsen
Tað var boðskapurin hjá Ólavi Sjúrðarbergi, formanni í Grindamannafelagnum.
Grindamannafelagið hevði aðalfund í gjár, men tað er synd at siga, at fráboðanin frá Sea Shepherd um, at tey koma til Føroya í summar, fekk nakra sum helst umrøðu.
Nøkur fá orð frá formanninum, var einastu ferð, at Sea Shepherd, varð tikin upp á tunguna á aðalfundinum hjá Grindamannafelagnum.
Ólavur Sjúrðarberg staðfesti, at sokallaðu umhvørvisverndarfelagsskapirnir hava ressast eitt sindur við aftur hetta seinasta árið.
– Fyri at varðveita limagjaldið, og peningastreymin inn í felagsskapirnar, noyðast jú at vísa, at teir gera okkurt, sigur hann.
– Umhvøvisfelagsskapir eru stórídnaður við nógvum pengum. At vera ímóti er at vera ein lívsstílur fyri at útvega pening til hesar felagsskapir.
Og nú tað aftur er greitt, at Sea Shepherd kemur aftur til Føroya í summar, skulu vit taka væl ímóti teimum, ljóðar áheitanin frá formanninum í Grindamannafelagnum.
– Vit skulu práta við tey og greiða teimum frá, hvat vit gera. Og vit skulu greiða teimum frá, at vit hava lógligan rætt at veiða á sama hátt sum at onnur hava rætt at veiða, vit á okkara hátt, tey á teirra hátt.
– Men vit halda, at teir áttu at havt okkurt størri mál at fingist við, nú ídnaðardálking er við at kvæla alt lív í heimshøvunum, sigur Ólavur Sjúrðarberg.
– So tá ið umhvørvisfólk, og útlendskir miðlar, ávara okkum ímóti at eta grind tí at hon er so illa dálkað, bera vit altjóða samfelagnum tann boðskap, at tey skulu heldur halda uppat at dálka.
Tað eru einir 1200 limir í Grindamannafelagnum. Endamálið er at arbeiða fyri, at vit skulu fáa frið at drepa grind í Føroyum og stuðla øðrum í burðardyggari veiði av hvali og kópi.
Endamálið er eisini, at allir føroyingar skulu fáa lut í grindini – ikki hvørja ferð, men eftir greiðum skipanum.
Á aðalfundinum stóð Ólavur Sjúrðarberg fyri vali, men hann varð einmælt afturvaldur til formann.
