Um 05-tíðina í nátt fekk løgreglan fráboðan um, at fleiri neyðrakettir vórðu sæddar úr Havn.
- Tá slíkt hendir, verður tú altíð eitt sindur skakkur, og tú noyðist at royna at finna út av, um nakar er í neyð á sjónum.
Vaktleiðarin visti í morgun at siga, at tað tó skjótt gjørdist greitt, at neyðrakettirnar vórðu skotnar upp onkustaðni miðskeiðis í Havn.
Sum skilst, vóru hesar einar fimm í tali.
- Vit royndu at finna út av, hvør sendi neyðrakettirnar, men hetta eydnaðist okkum ikki, legði vaktleiðarin aftrat.
Løgreglan minnir á, at tað er ikki bara"drengestreger" at senda upp neyðrakettir.
- Tað er í neyðstøðu, at rakettirnar skulu brúkast - og ikki til spæl, segði vaktleiðarin á løgreglustøðini í Havn í morgun.
