Rumenia tók í dag eitt sjáldsamt stig fyri at tryggja kølingina av einasta virkandi kjarnorkuverkinum í landinum.
Við einari stýrdari spreinging varð ein klettur í Donau sprongdur burtur, so meira vatn kann leiðast til Cernavoda-kjarnorkuverkið.
Myndir vísa, hvussu vatn og klettabrot verða slongd høgt upp í luftina eftir spreingingina.
Endamálið er at byggja eina fyribils byrging, sum skal beina meira vatn inn í ta ánna, har kjarnorkuverkið liggur.
Ein av teimum báðum reaktorunum á Cernavoda varð tikin úr rakstri í síðstu viku, tí ov lítið kølivatn var tøkt.
Hitabylgja og langvarandi turkur hava seinastu vikurnar fingið vatnstøðið í Donau at falla nógv.
Sama trupulleika hevur grannalandið Ungarn, har kjarnorkuverkið í Paks eisini er treytað av vatni úr Donau til køling.
Paks-verkið framleiðir vanliga umleið helmingin av allari elorkuni í Ungarn. Í dag koyrdi tað tó bara við umleið tíggju prosentum av vanligu orkuni.
Ungarski forsætisráðharrin, Péter Magyar, segði mánadagin, at verkið væntandi kann halda fram í einar tveir dagar afturat.
Bæði í Rumenia og Ungarn hava myndugleikarnir heitt á bæði húsarhald og fyritøkur um at spara upp á streymin.
Í Rumenia hava bilaverksmiðjurnar hjá Renault, sum framleiða Dacia- og Ford-bilar, samtykt at steðga framleiðsluni fram til 19. august fyri at minka um orkunýtsluna.
Donau er næstlongsta áin í Evropa og rennur ígjøgnum tíggju lond.
