Talið av deyðum eftir stóra eldin í Hong Kong er í dagin komið upp á 146, upplýsir løgreglan sambært blaðnum South China Morning Post.
Harumframt hava 79 fólk fingið skaða.
Enn hevur ikki eydnast løgregluni at fáa samband við 150 saknað fólk.
Av somu orsøk kann løgreglan ikki avvísa, at talið av deyðum fer at hækka enn meira komandi tíðina.
Ein embætismaður sigur, sambært tíðindastovuni Reuters, at leitingin eftir eldinum væntandi fer at taka tríggjar til fýra vikur.
Eldurin kyknaði mikudagin og breiddi seg skjótt til fleiri háhús í bústaðarbýlinginum Wang Fuk.
Eftir at eldurin var sløktur, funnu leitingarlið lík í íbúðum, trappurúmum og á takinum á háhúsunum.
Tað sigur Chen Ka-chun, sum stendur á odda fyri deildini hjá løgregluni, sum hevur ábyrgdina av at eyðmerkja tey deyðu, við South China Morning Post.
Higartil hava leititoymi klárað arbeiðið í fýra av sjey háhúsum, sum brunnu, sigur hann.
Ellivu fólk eru handtikin í sambandi við eldsbrunan, sum er tann deyðiligasti í Hong Kong í skjótt 80 ár.
Millum tey handtiknu eru tveir stjórar og ein verkfrøðingur. Tey eru undir illgruna fyri ósketni dráp.
Teir koma frá fyritøkuni Prestige Construction, sum stóð fyri umvælingini av bygningunum Wang Fuk.
Myndugleikarnir í Hong Kong kanna møguliga korruptión og nýtslu av eldfimum tilfari undir umvælingini.
Millum annað er illgruni um, at eitt bjálvandi tilfar, sum varð brúkt í vindeygunum í bygningunum, umframt net, sum vóru strekt útyvir pallin í háhúsunum, gjørdu, at eldurin breiddi seg.
Umframt eldfima tilfarið verður hildið, at sterkur vindur hevur verið við til at eldurin skjótt breiddi seg millum háhúsini.
Eftir eldsbrunan kundi sløkkiliðið at staðfesta, at brunaávaringarnar í bygningunum ikki virkaðu undir eldsbrunanum.
Enn er óvist, hvat elvdi til eldin.
/Ritzau/
