NSÍ venjarin var fegin, tá ið hann eftir dystarlok og 2-0 heimasigur ímóti HB hitti FM1. Hann rósti sínum spælarum fyri fínan hugburð og gott avrik, sum í fyrra hálvleiki átti at havt borið størri leiðslu enn 2-0, tá ið teir fóru at hvíla seg.
-Mínir menn vístu sjálvsálit og tordu at spæla og ikki sparka fótbólt. At teir tordu tað – eisini tá ið mótstøðumenninir royndu at pressa teir frammarlaga á vøllinum – hevði avgerandi týdning. Uppsillingin var broytt soleiðis, at vit vóru í 3-4-3 útgávu í staðin fyri 3-5-2. Tað er styrki at vera førur fyri at vera í fleiri útgávum, og mínir menn vístu í kvøld, at hetta megnaðu teir væl, sigur Glenn Ståhl, sum rósar Tórði Thomsen fyri stórbjargingar, tá ið støðan í seinna hálvleiki var 2-0.
-Tað hevur ofta verið sagt, at NSÍ ikki megnar at vinna ímóti stóru liðunum. Nú eru vit fyrsta liðið, sum hevur vunnið ímóti HB, og vit hava megnað javnleik á útivølli ímóti bæði KÍ og B36, og tað eru vit nøgdir við, sigur NSÍ venjarin.
Var tað tykkara góða avrik ella laka avrikið hjá HB, sum var orsøk til úrslitið?
-Tað valdast sjálvandi eygað, sum sær, men ivaleyst var tað bæði okkara góða avrik og ikki so sannførandi avrikið hjá HB í kvøld.
HB venjarin Jens Berthel Askou staðfestir, at hetta var ikki dysturin hjá hansara monnum:
-Tað riggaði ikki. Persónlig mistøk í verjupartinum og óneyvar temjingar og skeivar avgerðir, tá ið tað var um at verða vandamikið í álopspartinum bóru við sær, at tað ongantíð varð heilt vandamikið. Tá ið vit so í seinna hálvleiki megnaðu at vinna okkum í tvær góðar støður eftir innlegg úr vinstru, so vardi málverjin hjá teimum meistarliga væl.
Tit høvdu Mads Bo Mikkelsen í hópinum í kvøld?
-Hann heilsaði fyri fyrstu ferð upp á liðfelagarnar, tá ið vit ótu saman, áðrenn vit fóru inn til Runavíkar. Hann hevur ikki spælt í síðstuni, so vit skiftu hann ikki inn fyrr enn fram ímóti dystarenda. At hann er arbeiðssamur, bólttryggur og við góðum spælskili, haldi eg sást longu í kvøld, so vit gleða okkum at fáa nyttu úr honum.
Fleiri spælarar eru skaddir. Nær verður ein nýggjur spælari aftrat at síggja í HB búnanum?
-Tað dugi eg einki at siga um, sigur HB venjarin.
| HB | 9 | 7 | 1 | 1 | 23 | 8 | 22 |
| NSÍ | 9 | 6 | 2 | 1 | 22 | 4 | 20 |
| KÍ | 9 | 6 | 2 | 1 | 26 | 9 | 20 |
| B36 | 9 | 6 | 1 | 2 | 26 | 13 | 19 |
| Víkingur | 9 | 4 | 2 | 3 | 14 | 13 | 14 |
| ÍF | 9 | 4 | 1 | 4 | 12 | 20 | 13 |
| EB/Streymur | 9 | 2 | 1 | 6 | 6 | 16 | 7 |
| TB | 9 | 1 | 3 | 5 | 6 | 12 | 6 |
| AB | 9 | 0 | 4 | 5 | 5 | 24 | 4 |
| Skála | 9 | 0 | 1 | 8 | 6 | 27 | 1 |
10. umfar
Fríggjadagin 26. juni
EB/Streymur - B36
Sunnudagin 28. juni
ÍF - TB
Víkingur - KÍ
Skála - HB
AB - NSÍ
