Nýggjur deildarleiðari í Ráðgevandi deildini í Námi er 40 ára gamli Tóri Slættalíð. Hann er útbúgvin lærari við yvirbygningi í kt, læring og organisatión í broyting frá Aalborg Universiteti.
Nám hevur arbeitt við bygnaðarbroytingum, sum merkir at nýggja ráðgevandi deildin í Námi fer at fevna um námsráðgeving, bókasavn, kt-didaktiska økið, skeiðsvirksemi, trivnaðarøkið og aðrar tvørgreinaligar verkætlanir.
Deildin er ein samanlegging av námsfrøðiliga ráðgevandi toyminum og kt-toyminum, sum var.
Umframt at menna námsfrøðiligu ráðgevingina út til skúlarnar, fer Nám við nýggju deildini eisini at leggja seg eftir at menna kt-didaktiska økið.
Uppgávurnar á kt tekniska økinum verða fluttar í Undirvísingarstýrið og nýggja Skúlanetið, so hvørt sum nýggja kt leiðslufyrisitingarskipanin og Skúlanetið verða sett í verk.
Tóri Slættalíð tók við nýggja starvinum sum deildarleiðari í Ráðgevandi deildini í Námi hin 1. august 2022, skrivar nam.fo.