Longu undan seinasta landskappingarumfari hetta vikuskiftið var greitt, at Hvidovre hjá Øssur Dalbúð og FC Fyn hjá Viljormi Davidsen vóru flutt niður. Ógvuliga symbolskt var hetta staðfest við enn einum tapi sunnudagin.
Hvidovre tapti tepurt fyri Næstved, 2-3, uttan at Øssur Dalbúð slapp upp í part. Hetta var 19. ferðin í ár, at Hvidvore tapti. Fimm ferðir hevur liðið spælt javnt og seks ferðir hava teir vunnið. Tilsamans gjørdist talan um 23 stig til Hvidovre.
Lítið betri var støðan hjá FC Fyn. Teir taptu ruddiliga fyri Næstved 4-0. Viljormur Davidsen spældi, sum vant, dystin á tamb á bakkinum, har hann var partur av 16. tapinum hjá FC Fyn í ár. Eisini Bjarni Jørgensen slapp upp í part hjá FC Fyn, tá hann varð skiftur inn í 69. minutti.
Atli spældi javnt
Meðan úrslitini hjá FC Fyn og Hvidovre avgjørt ikki hava verið nakað at reypa av, hevur tað verið á heilt góðari leið hjá Atla Danielsen og FC Roskilde. Teir endaðu kappingarárið við javnleiki í móti Kolding, sum flutti niður saman við FC Fyn og Hvidovre. Sum hann plagar, stýrdi Atli Danielsen slagnum á miðvøllinum í samfullar 90 minuttir.
Tíverri rakk innsatsurin frá honum og liðfeløgunum ikki longur enn til ein javnleik. Tískil endaði FC Roskilde á einum áttanda plássi, sum avgjørt er góðtikið. Hinvegin droymdu Atli og teir um sætta plássið, sum hevði verið besta úrslit í søgu felagsins, men so langt rukku teir ikki á hesum sinni.
Nú er næstbesta danska fótbóltsdeildini farin í summarfrí. Atli Danielsen og Viljormur Davidsen kunnu tó ikki slappa av enn, tí Brian Kerr hevur boðsent teimum báðum til landsdystirnar í móti Slovenia og Estlandi.
