Tað gjørdist ein góður dagur hjá føroyingaliðunum í næstbestu donsku hondbóltsdeildini hjá kvinnum.
Í høllini í Frederiksberg vunnu Marianna G. Eystberg (myndin), Brynhild Pálsdóttir og liðfelagarnir í Ydun 31-25 á SIK Viborg. Í steðginum var Ydun á odda 14-10.
Marianna skoraði fýra mál og Brynhild skoraði eitt mál.
Við sigrinum er Ydun røttumegin niðurflytingarstrikuna. Tær hava 10 stig á fjórðaftasta plássinum. Beint aftanfyri Ydun er liðið hjá Rannvá Olsen, Ejstrup/Hærvejen sum hevur níggju stig.
Lív og Vár B. Zachariasen og liðfelagar teirra í Ajax eru nú veruliga partur av uppflytingarstríðnum.
Ajax vann á útivølli stórsigur 38-26 á Sæby. Í steðginum var Ajax á odda 18-11. Lív var noterað fyri eitt mál.
Ajax er fjórðfremst í deildini við 20 stigum, sama stigatali sum triðfremsta liðið, AGF, og næstfremsta liðið, Rødovre. Holstebro er við 28 stigum langt fremst í deildini.
