Í dag klokkan 17 fer føroyska A-landsliðið inn á Olympic leikvøllin í Baku. Ein leikvøllur, sum rúmar næstan 70 túsund fólkum, men UEFA-umboðið sigur, at mett verða at einir 20 túsund áskoðarar til dystin í kvøld.
Tað stendur nógv upp á spæl hjá bæði vertunum og okkum. Aserbadjan kann við sigri tryggja sær ein bólkafinalu í Pristian í Kosovo, meðan Føroyar við sigri enn kunnu koma víðari, um Kosovo ikki vinnur á Malta í dag. Gongur illa hjá okkara monnum í seinastu tveimum dystunum í Nations League, so kann tað fáa ávirkan á EM 2020 lutakastið.
Nations League:
Vit byrja í D-deildini í Nations League, har vit eru í bólki 3. Kosvo er á odda við átta stigum, Aserbadjan hevur seks stig, Føroyar hava fýra stig, meðan Malta hevur tvey stig. Í dag spæla vit móti Aserbadjan í Baku, meðan Kosovo spælir móti Malta á Malta.
Kosovo er favorittur at vinna á Malta, men við tveimum javnleikum móti Aserbadjan, so er ein møguleiki fyri, at Malta eisini klárar javnleik móti Kosovo. Hendir tað, og Føroyar vinna á Aserbadjan í kvøld, so hava vit framvegis møguleikan at koma víðari, tá sætta og seinasta umfar er í bólkinum. Tað krevur so aftur ein sigur til okkum á Malta, meðan Aserbadjan vinnur á Kosovo í Pristina.
Tað er eisini trýst á Aserbadjan í kvøld. Vinnur Kosovo á Malta, skal Aserbadjan vinna á Føroyum, fyri at hava nakran møguleika at koma víðari. Hetta hevur verið nevnt sum ein fyrimunur hjá okkara spælarum í dag, tí Aserbadjan kann ikki brúka ein javnleik til nakað.
Hugsa vit bara um okkum, so er setningurin greiður. Vit skulu vinna, fyri at hava nakran møguleika at koma víðari.
EM 2020:
Tað stendur eisini nógv upp á spæl hjá føroyska landsliðnum, nú lutakast til EM 2020 verður fyrst í komandi mánaði. Tað eru seks styrkisbólkar til lutakastið, har Føroyar eru á markinum til at detta niður í sætta og niðasta styrkisbólkin. Tað merkir, at vit einki land fáa í okkara bólk, sum er styrkismett lægri enn vit. Eitt nú Andorra og San Marino.
Úrslitini í seinastu tveimum umførunum í Nations League eru avgerandi fyri, um tað eydnast ella ikki. Vit eru í kapping við lond sum Lettland, Malta, meðan Gibraltar er eitt frammanfyri okkum. Tí kann ein javnleikur í dag fáa stóran týdning.
Tað er tó eitt men. Tí helmingurin av bólkunum til endaspælið í EM 2020 hava bara fimm lið. Tað vil siga, at um vit enda í næstniðasta styrkisbólkinum, so er ein møguleiki fyri, at tað bara verða fimm lond í bólkinum. Tað sleppa vit undan, um vit detta niður í lægsta styrkisbólkin, men so eru vit eisini lægst styrkismett.
Nations League:
Deild D – Bólkur 3
5. umfar:
Leygardagin 17. november
Aserbadjan - Føroyar
Malta – Kosovo
6. umfar:
Týsdagin 20. november
Malta – Føroyar
Kosovo – Aserbadjan
Støðan:
1. Kosovo 8 (stig)
2. Aserbadjan 6
3. Føroyar 4
4. Malta 2
