– Havnar Framburðsfelag fer fyrst og fremst at fundast um nýggj landsstýrisfólk. Eg fái ikki sagt nakað um støðuna hjá felagnum til hetta málið, fyrr enn tað er viðgjørt í felagnum, sigur Regin W. Dalsgaard, sum er næstformaður í valfelagnum hjá Fólkaflokkinum í Havn, Havnar Framburðsfelag.
Hann sigur, at sjálvandi stuðla tey teirra umboð, Anniku Olsen, sum eisini er teirra umboð í Tórshavnar býráð. Men hann fær ikki sagt nakað um, hvørja støðu Havnar Framburðsfelag hevur til alt hetta málið, fyrr enn tað er viðgjørt í felagnum. Hann sigur tó, at tað sjálvandi ikki er rætt at bróta avtalur, men hetta, sum Annika Olsen hevur gjørt, er kortini ikki nakað eindømi í Fólkaflokkinum.
Støðan er tann, at Fólkaflokkurin hevur tveir tómar sessir í landsstýrinum, eftir at Jacob Vestergaard og Elsebeth Mercedis Gunnleygsdóttir løgdu landsstýrissessirnar frá sær mándagin 20. desember fyri at fáa Anniku Olsen úr Løgtinginum – hon er annað varafólk floksins á tingi fyri landsstýrisfólk. Tað eydnaðist ikki at fáa hana út til fundin, har málið sammøður varð samtykt, tí Jørgen Niclasen ikki eisini legði sín landsstýrissess frá sær, og tí at Heðin Zachariassen fór í farloyvi, fyri at geva Anniku Olsen møguleikan at atkvøða fyri málinum hjá andstøðuni um sammøður, sum snýr seg um at geva samkyndum rættindi.
Sum skilst er tað ein meiriluti av tingmanningini, sum hevur somu støðu sum tey bæði landsstýrisfólkini. Og vilja tey ikki hava Anniku Olsen aftur á ting, so kunnu tey bara lata vera við at koyra nakran av tingmanningini í landsstýrið – so missir Annika Olsen tingsessin, sum hon annars hevði havt til næsta val.
Tingbólkurin hjá Fólkaflokkinum hevði fund um málið seinnapartin í gjár, og tann fundurin verður uppafturtikin seinnapartin í dag.
##med2##
Regin W. Dalsgaard sigur, at nevndin í Havnar Framburðsfelag fer at hava fund um málið í kvøld, og sigur, at tað sum hevur størstan týdning er at tað verða vald tvey skikkað fólk í landsstýrið.
Men hóast hann sigur tað, so snýr tað seg um, hvussu tingmanningin ætlar at telva í hesum máli. Tí vilja tey halda Anniku Olsen uttanfyri, so skulu tey bara velja tvey fólk uttan fyri tingbólkin í landsstýrið. Tað ber væl til, men tað er ikki vanligt, at ein stórur flokkur við átta tingfólkum bara hevur eitt tingfólk í landsstýrinum.
Tí er spurningurin, um tingbólkurin vil revsa Anniku Olsen, so hon ikki sleppur á ting aftur. Sleppur hon hinvegin aftur á ting, tí at ein ella tveir persónar, sum eru framman fyri hana á listanum fara í landsstýrið, so hava Jacob Vestergaard og Elsebeth Mercedis Gunnleygsdóttir ofrað sínar landsstýrissessir til onga nyttu.
Regin W. Dalsgaard vil ikki siga sína støðu til málið um sammøður, men hann sigur, at Havnar Framburðsfelag heldur, at flokkurin átti at loyst hetta málið, áðrenn tað kom so langt. Hann sigur, at tað kundi ikki koma óvart á nakran, at Annika Olsen fór at atkvøða fyri.
Men hann sigur eisini, at tað er ikki rætt av Anniku Olsen at bróta avtalur, sum samgongan hevur gjørt – og soleiðis bróta samgonguskjalið.
Tað er eingin treyt, at landsstýrisfólk skulu vera vald á ting ella yvirhøvur hava stillað upp til løgtingsval. Í veruleikanum kann ein og hvør gerast landsstýrisfólk. Hóast tað er løgmaður, sum tilnevnir landsstýrisfólk og kann koyra landsstýrisfólk úr starvi tá hann vil og um hann vil, so er tað vanligt, at tað eru flokkarnir sum gera av, hvør umboðar tey í landsstýrinum, meðan løgmaður tekur formligu avgerðina.
Tey, sum skulu taka støðu til, hvør skal í landsstýrið fyri Fólkaflokkin eru hesi:
1 Beinir Johannesen 998
2 Jacob Vestergaard 783
3 Jørgen Niclasen 722
4 Jógvan á Lakjuni 683
5 Christian Andreasen 580
6 Jákup Mikkelsen 548
7 Uni Rasmussen 465
8 Elsebeth Mercedis Gunnleygsdóttur 461
9 Heðin Zachariasen 342
Átta tey fyrstu eru vald á ting. Av tí, at Jørgen Niclasen er landsstýrismaður, hevur Heðin Zachariasen sæti fyri hann.
Hini, sum stillaðu upp, men sum ikki vórðu vald, eru hesi:
10 Annika Olsen 289
11 Brandur Sandoy 289
12 Jóhan Eli Lyngvej Poulsen 230
13 Rógvi Egilstoft Nielsen 227
14 Pól Huus Sólstein 225
15 Hans Andrias Kelduberg 196
16 Bjartur Nolsøe 162
17 Hanus Samró 146
18 Símun Jóannesarson Hansen 132
19 Birgir Nielsen 107
20 Sámal Jákup Sakarisson 89
21 Jonhard Danielsen 87
22 Frits Strøm 60
23 Hans Joensen 44
24 Joan Samuelsen 44
25 Ingvør Justinussen 35
26 Jákup Martin Kjeld 33
27 Eivind Jacobsen 24
28 Rigmor Rasmussen 20
