Elias Ellefsen á Skipagøtu og liðfelagarnir í THW Kiel vóru hóskvøldið fyri fyrsta tapinum í bundesliguni hetta kappingarárið.
Tað svíður eyka, at tapið var fyri lokala arvafíggindanum, Flensburg-Handewitt sum hevur fleiri danskar landsliðsleikarar á liðnum.
Kiel var á odda 17-14 í steðginum, og teir vóru á odda 27-24 tá færri enn fimm minuttir vóru eftir. Men tað endaði við einum 27-28 tapi. Danski Emil Jakobsen skoraði sigursmálið til 28-27 í allarseinasta sekundi.
Stutt áðrenn bjargaði málverjin hjá Flensburg einari málroynd hjá Eliasi.
Elias skoraði fýra mál og legði upp til eitt mál hjá Kiel.
Havnarmaðurin á danska landsliðnum, Jóhan á Plógv Hansen skoraði seks mál fyri heimaliðið.
HER ber til at síggja ein fimm minuttirs samandrátt av dystinum frá týsku sjónvarpsrásini, NDR. Á samandráttinum síggjast eisini nøkur góð mál hjá hoyvíkinginum og havnarmanninum, ið vóru á vøllinum fyri hvør sítt lið.